Haka sien wa nyngkong hapoh ka ri India kiwa chah ktah ha u COVID-19 haka 24 kynta da tam ki 50 hajar ngut deiwa em 52,123 ngut hadooh ynne i step ka 30 tarik, katkam ka yukheiñ ka Ministry of Health & Family Welfare deilang waka ICMR.
Na kini ki 52,123 ngut, kiwa chait da em ki 32,553 ngut iwa da pynpoi 10 lak ngut kiwa chait. Kiwa dang em ya uni u khñiang da ku ki da 18,795 ngut wei da em leh sa 775 ngut kiwa yap.
Ki jylla wa ku dooh kiwa dang em ya u COVID-19 toh ha Andhra Pradesh 7,244 ngut, Karnataka 3,014 ngut, Uttar Pradesh 2,063 ngut waka Maharashtra 1,435 ngut.
Ki jylla won kiwa doon dooh kiwa dang chait toh ha Maharashtra 7,478 ngut, Tamil Nadu 5,927 ngut, Karnataka 2,397 ngut waka Andhra Pradesh 2,784 ngut.
Ha ini waroh, ka Maharashtra da tam ko 4 lak kiwa da dep yoh ya u COVID-19 deiwa em 4,00,651 ngut heiwa kiwa chait da em ki 2,39,755 ngut katwa kiwa dang em ya uni u khñiang da em ki 1,46,433 ngut.
Hapoh ka ri, kiwa chait da em ki 64.44% iwa hiar naka 64.51% kiwa em waroh 10,20,582 ngut. Kiwa dang em ya uni u khñiang da em ki 33.35% iwa ku naka 33.26% kiwa em 528,242 ngut, wa 2.21% kiwa yap kiwa em 34,968 ngut. Waroh da poi 15,583,792 ngut.
Kiwa chiat da tam ki da 4,92,340 ngut ya kiwa dang em ya uni u khñiang iwa ku da 13,758 ngut nadooh ynnin ka sngi.
