Ki Volunteer ka Community Covid-19 Management Committees (CCMC) Laitkor, Shillong da ya kreh chitom ki yow pyntikna wa kiwa chong chnong yong ki kiwa leh yaka Quarantine ym chem chitom ki hei wow yoh yeiwa emkaam ki man-ka-sngi, heijooh i por wow booddien yei long i man yong ki kamjooh wow yarap ya kitu kiwa emkaam yei sumaar wa jhan.
Kini ki Volunteer da hap ki leh wow lai thied yaki mar wa emkaam neibynta kitu ki manyung wa em hapoh ki Containment Zone kiwa ym chah wow mih ki cha lait. Kamtæ yaki marbaam da li booh cha yung kini ki bru.
U Rupert Lyngdoh, Secretary Chnong, Laitkor Rngi Dorbar Shnong & Joint Secretary Laitkor Pyllun Dorbar Shnong da pyntip u wa waroh ki Rangbah Shnong da dep ki wow chna ya ki COVID 19 Team haki chnong kiwa kynthup lang nadoh ki seiñ khynroo, ki dong, ki wakreh, Asha, Anganwadi, ki Gram Sevak nadooh u bnai April.
Deiwa ku kiwa yoh COVID-19, ki dkhot ka CCMC da pynche ki yaki paidbah heiyatoh wa kani ka khlam khamtam ki dak ki chin lada yoh ya uni u khñiang. Lada chem leh ya kiwon kiwon ki bru kiwa tyngkheiñ yaki kyndon, da maham chwa haka sien nyngkong wei da daiñ kuna hadien won katkam wa da booh.
Hadien wa da pynbna kam ki Containment Zone, ki Volunteer da chim ki leh saka yukit wow thied yaki tiar ki tar wa emkaam ya kitu kiwa em ha ki Containment Zone kiwa ym chah wow mih cha lait yow li booh ha tre dwar ki.
Ini man ko leh kam chibynta wow pynclur yaki bru wow neh ki hapoh yung.
