Jowai: U District Magistrate, West Jaiñta Hills da pynmih hukum u ynne ka sngi wow pyndam noh yaka hukum pynbna pynman Containment Zone yaka New Hill, Jowai kawa haap hapoh Ladthalaboh Urban PHC kawa da pynbna haka 25 tarik uni u bnai.
Kani ka hukum da pyndam yaka nadooh ka 6:00 AM, 31st July 2020 hadooh wa pynmih hukum da kamwi.
U District Magistrate da pyntip u wa ya kani ka hukum da pyndam na kani ka thaw hadien wa yoh yaka Report naka Health & Family Welfare Department, West Jaiñtia Hills wa yaka Contact Tracing da dep wow leh wei ym em chem ya kiwon kiwon kiwa yoh COVID-19.
U District Magistrate da pyntip u leh wa da pyndam yaka Containment Area hapoh kini ki kyndon da wah:
- Ka Village COVID-19 Management Committee deiwa ya krehlang waka District Administration kamjooh waki District Police daw pyntikna ki wa waroh ki kyndon ka Health and Family Welfare Department kam wow deiñ yaki Mask, wow leh yaka Social Distancing ha ki thaw paidbah toh u bood ya ki da kiwa chong chnong.
- Toh u ya krehlang waki bor ka District Administration, District Police wa kiwa pynlai chnong.
Chooh chooh u District Magistrate da phah u ya waroh kiwa chong chnong wow bood yaki kyndon heiyatoh wa i chait i khiah kamjooh kiwa da khang wow leh.
