Ka lehniam Behdiñkhlam ka Raij Muthlong da poi ko cha wakut ynne ka sngi kawa pynman ha ki ar sngi deiwa bood yaki kyndon sorkar ha Biar Nohrong ka Raij Muthlong ha Thadmuthlong wei da man ko kawa chongkun.
Ka lehniam kawa sdang nadooh ka 1 tarik uni u bnai ka sngi Muchai heiwa da pyndep yaka lehniam kamjooh ka chad Uiñ Talawiar Chnong wei haka 2 tarik, dang step ka sngi Pynkat da pyndep yaka lehniam da u Chutia ka Raij Muthlong kawa khut kam ka “Sang Sngi Khlam” wei heipor chiteiñ sngi da pyndep chooh chooh yaka lehniam da ki waheh yong ka Raij kam u Langdoh, Sangot, Maji, Chutia, Waheh Tre, ki waheh ki San Kur wa ki Khynde Kni Khynde Pa, deilang waki khon chongbri chong khyndaw ka Raij ha Biar Nohrong.
Ha kani ka lehniam Behdiñkhlam ka Raij Muthlong, da wan chimbynta ki khon ka Seiñ Raij Muthlong, Seiñ Raij Thadsning, Seiñ Raij Mukhap, Seiñ Raij Rashai, Seiñ Raij Latymphu wa Seiñ Raij Pammanik wei waroh kiwa wan da e ngooh e dem Blai yow beh ya kani ka khlam kawa tip kam ka COVID-19 cha wa soo wa sep ka sngi kawa ym chynna de na kani ka pyrthai.
Ha ini i ngooh i dem Blai da chimbynta arngut na kawi ka chnat seiñ deiwa bood yaka Social Distancing wa da phah da ka aiñ sorkar, wei ya ini, ynne ka sngi da wan sakhi lang kam u kongsan u B. Langbang uwa man u BDO ka Laskeiñ Block wa u C. Langbang, Acting Dolloi ka Elaka Shangpung kam u symbood kongsan.
Chooh chooh ha kani ka lehniam Behieñkhlam, ka Seiñ Raj Muthlong da e sñiawngooh kyrpang kyrpang ko khamtam ya ki President, ki Secretary, kiwa yahkhmat waroh, ki khon ka Seiñ Raij wa yaka Phramer Police Trafic Cell kiwa da yakreh borbah doh wa mynsien wow pynbiang ya iwa emkaam ha kani ka lehniam Behdieñkhlam.
