Ka Jaintia Students’ Union (JSU) da kyrchaan pura ko wow sdang biang i khayi khappood lyngba ka Dawki Land Custom ha Tamabil namo ka Export & Import wa ka ri Bangladesh ryngkat i bood ya ki kyndon wa da booh ka sorkar.
Ka JSU da ong ko wa katni nei khang i khayi waka Bangladesh da booh ko hei eh i khoo ya kiwa yah truck, kiwa tih moo, mylla sngi wa har rukom kiwa chaniah tylli ha kani ka kaam wei da booh ko leh hei eh ya kiwa khayi namo ki Exporter neibhah wa ki ram wa chim ki, kamjooh leh nei dooh wow khayi da chem chitom ki wow psa ya ki khon ki kti yong ki.
Ka seiñ da pynche ko leh wa i pyrchah wow sdang biang ya i khayi khappood ha kini ki sngi wa dadep toh neidaw wa tieñ ko ya sdang biang i khayi kam nachwa khlem ki kyndon wa biang namo kiwa tlot wei kwah ko wow pynsñiaw ya ka sorkar wow chimkhia wow pynbiang ya ki kyndon kiwa yada ya ki paidbah ka jylla.
Ka JSU da kyntu ko leh ya ki paidbah wa pyrchah yeini wow pyrkhat yillu ki neibhah waka sorkar em ko hapyrdi i chitom poisa khamtam heini i por wa yakhun ko ya ka khlam u COVID-19, kamtæ daw chem chitom ko leh wot wow su ya ka tulop cha ki ki wakreh ha kani ka kaam nadooh ki Doctor, ki Nurse, ki pulit, wa kiwi kiwi.
Chooh chooh da ban ko deiwa ong wa lada pyrchah yei khayi ha khappood na Tamabil ym yahaap i neibhah ki mar na baar jylla kam na Andhra Pradesh næ Gujarat wa kiwi ki jylla leh wan poi ki chapoh ka jylla kamtæ lada wyrchaw iyi yaphær wa i khayi waka Bangladesh wa kini kiwi ki jylla.
Da kyntu ko leh ya kiwa embynta ha kani ka kaam wow bood ki thij ya ki kyndon wa da booh ka sorkar neipor cheipor heiyatoh wa kani ka bynta.
Hajrong kini ki bynta, neiliang ka seiñ da kyrchaan ko wow pteiñ biang i khayi waka Bangladesh deiwa bood ki wakreh ha kani ka kaam ya ki kyndon wow yada na u COVID-19, da ong u President ka JSU War Jaiñtia Circle u Eddy Kery Pohtam wa u General Secretary u Kerrydiam Lamin.
