Khliehriat: I pyrchah ya kawi ka karkhana Coke dang pteñ i hadooh ynne ka sngi heiwa sa ka Deiñsatlang Welfare Society (DWS), Deiñsatlang Village, Elaka Rymbai, East Jaiñtia Hills da e ko yei kyrchaan wa pura ya ka Joint Action Forum (JAF) wow pyrchah bait yei booh ya ka Unique Industry Manufacturing Unit ha Wah Deiñling kawa haap hapoh u pood ki soo chnong wa kynthup ya ka Umsatai, Deiñsatlang, Ladwahwapung wa Pynurkba heiwa ki Waheh Chnong da e NOC ki khlem tip ki paidbah ki chnong.
Ka DWS da e ko da ka chithi ujor ynnin ka 5 tarik ha u F.M. Dopth, Deputy Commissioner, East Jaiñtia Hills Dist wow pynsangeh ya katai ka Coke Plant ha Wah Deiñling neibhah daw ktah ko ya i rep i riang yong ki paidbah wa chong chnong khamtam daw ktah joor ko ya kawi ka thaw chara dieñ (Nursery) kawa pynkreh da ka Meghalaya Basin Development Unit, Khliehriat ha ka chnong yong i, da ong u D. Rymbai, Secretary ka DWS.
Kamtæ ka DWS da beiñ joor ko yei leh ki waheh chnong deiwa e NOC khlem tip ka Dorbar Chnong heiwa ka Society da ong ko ka District Council toh u pyndam ko syndon ya ka Sanad yong ki waheh wa tyngkhaiñ ya ka aiñ yong ka JHADC Act 2015 kawa toh ka aiñ ki Waheh Chnong.
Kani toh katkam ka khubor lyngba u D. Rymbai, Secretary DWS, EJHD.
