Khliehriat: U District Magistrate, East Jaiñtia Hills District ynne da ong u wa hadien wa yoh ya ka ujor na ki paidbah wa ki bor chnong ka Hingaria, Kwator, Borghat, Natbor heiyatoh wa i chah pynjæd ki wah ha ki bru heiwa da tynyap ya ki dakha wa ki doh-um ha wah Tisang wa Prang wa kiwi ki wah hapoh ka District deiwa e bih, tympdung bom wei ini da man i pyrchah ya ka aiñ Fisheries Act 1897 wa ka United Khasi Jaintia Hills District Fishery Act 1954.
Kamtæ kam chibynta wow yada ya ki dakha wa ki doh-um wa kamjooh yei emkaam ki paidbah, neiliang u District Magistrate, ka District, da pynkrehkaam u ya ka Section 144 Cr.P.C wow khang u e bih wei wow tympdung bom ha wah Tisang wa ka wah Prang kamjooh leh wow tynyap ya ki ha kiwon kiwon ki wah hapoh ka District.
Da khang leh wow pynemkaam ya kiwon kiwon ki dawai wa man bih (chemical and biological substance) kiwa ye u ktah ya ki dakha wa ki doh-um wa iwon iwon i jait kaam wow pynman bih ya ka um ha ki wah wa ye won wow ktah ya ki dakha kamjooh leh ki bru.
Lada chem ya kiwon kiwon kiwa leh pyrchah yeini da ki bor chnong daw chah pynchitom ki katkam ki kyndon ka aiñ.
Kani ka hukum u krehkaam ko nadooh wa pynmih ya ka hadooh wa pynbna deiwi tawon.
