Kiwa dang yoh COVID-19 hapoh ka jylla dang neh ki kamjooh nadooh ynne step hadooh ynne i sngi wa yachem u DHS (MI) ka jylla u Dr. A. War wa ki laad pathai khubor heiwa kiwa dang yoh da em ki 17 ngut katwa kiwa chait da em ki 12 ngut.
Na ki 17 ngut kiwa dang yoh thymme, 12 ngut toh kiwa na East Khasi Hills 2 ngut na North Garo Hills wa 3 ngut na West Garo Hills.
Kiwa yoh thymme ynne ka sngi napyrdi ki bru paidbah- ha East Khasi Hills 5 ngut na ki dong waphær waphær kiwa yachem wa uwa yoh COVID-19 uwa yah kari uwa wan na Siliguri, 4 ngut kiwa yabi, 7 ngut na RP Chest Hospital wei dang takit kammon yoh ki ya u COVID-19 wei kammon kreh bait ki hanla da em wa yoh COVID-19 ha katai ka Hospital.
Kiwa dang yoh thymme ha West Garo Hills toh 3 ngut ki BSF, ha North Garo Hills ki 2 ngut toh 1 wa liwan na Assam wa 1 wa dang thung kreh ha ki kaam chait i khiah.
Na ki wakreh ha ki kaam i chait kiwa da yoh COVID-19 da em ki 50 ngut heiwa du na East Khasi Hills da em ki 34 ngut.
Heiyatoh wa uwa dai cha ha Police Bazaar, kiwa yachem wa yajan wa oo kiwa dai cha man Negative ki wei ya kiwa boon dang booddien yaki.
Kiwa dang em COVID-19 ha ki District man ki kamni ha wah:
East Khasi Hills-453 (BSF-142, bru paidbah-245, kiwi ki chnat chipai-66)
West Khasi Hills-6
South West Khasi Hills-0
Ri Bhoi-65
West Jaiñtia Hills-15
East Jaiñtia Hills-18
West Garo Hills-31
South West Garo Hills-2
South Garo Hills-2
East Garo Hills-0
North Garo Hills-2
Kiwa dang chait ynne ka sngi kiwa em 12 ngut, ha East Khasi Hills da em ki 4 ngut heiwa 3 ngut toh ki bru paidbah wa 1 BSF, ha Ri Bhoi 7 ngut ki bru paidbah wa 1 ha West Jaiñtia Hills.
Waroh kiwa dang em ya uni u khñiang da em ki 594 ngut, kiwa chait 423 ngut wa 6 ngut kiwa yap iwa da poi waroh 1023 ngut kiwa da dep yoh COVID-19 hapoh Meghalaya.
Waroh ki nongmuna wa da dep phah Test da em ki 40700 tylli, kiwa dang yang Result 39294 tylli wa kamwa 383 tylli kiwa dang yang Result.
Kiwa psiah chapoh ka jylla da em ki waroh 26286.
