Shillong: Ka Deputy Commissioner, East Khasi Hills District haka hukum wa pynmih haka 9th August, 2020 da chah biang u wai ki 451 tylli ki dukan nadooh 8:00 AM hadooh 6:00 PM katkam ka pali wa da booh da u Acting Syiem, Hima Mylliem.
Ka hukum da ong ko leh wa u Syiem ka Hima Mylliem toh u pyntikna u wa kiwa chongdai dukan u bood ki thij yaka kyndon sorkar lyngba ka Health and Family Welfare Department.
Ka Iewduh COVID-19 Management Committee kawa da chna wow pait ya ini i pynlai yaka yaw kawa man dkhot u Acting Syiem ka Hima Mylliem kam uwa yahkhmat, da emlang ki Montri u Syiem Mylliem, ki pulit u Syiem ka Hima Mylliem, ki Enforcement ka Khasi Hills Autonomous District Council kam ki dkhot deilang waki Magistrate ka Deputy Commissioner ka East Khasi Hills, Shillong ki bru u Superintendent of Police, East Khasi Hills, Shillong kamjooh ki bru u District Medical & Health Officer ka East Khasi Hills, Shillong.
I wai kini ki 451 tylli ki dukan toh u man ki thij katkam ka Standard Operating Procedure ka sorkar deiwa bood leh yeiwa phah ka Health and Family Welfare Department, khlem pep.
Kiwa chongdai dukan kamjooh kiwa wan thied tiar toh u booh ki yaka Social Distancing deiwa yajngai 6 Feet, ym toh wow ya khynnia ha iwi i dukan, toh u deiñ leh yaki Mask, u man kiwa lehkhooid khamtam yaki kti. Toh u booh leh yaki Hand Sanitizer ha waroh ki dukan, hap leh wow sait ya i dukan dei langær wei wow ya krehlang wa u Syiem ka Hima Mylliem.
Ya kiwa tyngkheiñ yaka hukum daw khang yaka dukan yong ki.
