Ka Chnong Panaliar, Jowai na kipor cha kipor da yaleh ko u thooh ki laad yaleh pyrchah yei poor u khñiang kjut COVID-19 chapoh ka chnong, kamtæ dei yakrehlang haka chnong waroh kawi, chirup waka Village COVID-19 Management Committee waka Executive Committee, da e laad ya ka chnat VDP wow pait wow pynkreh yeibynta i khooid i pliah ka chnong, kawa man kawi na ki laad wow pyndooh yei poor u COVID-19.
Kamtæ, ka VDP da rai ko wow kyntu ya waroh kiwa chong chnong wow ya pynkhooid jar jiar i dwar i pchem kamjooh i luti syngkieñ ha khmat yung yong ki, chisien chitayaw wa man ka sngi chohthat lane bibar. Ya ini i pynkhreh, neiliang ka VDP da khoh pyrtuid ko ka kam ka Yearlong Cleaning Drive hajrong ka phang – To fight against COVID-19.
Kamtæ ynnin ka 9 tarik heipor 10 waje i step da sdang yaka heiwa da pynlai yaka yalang wa khian da u Careme Phawa, General Secretary ka chnong wei da yoh yei klam tbian heijooh ipor wow pynbna yow sdang ya ini i thmu ka VDP da u Waheh Chnong ka chnong Panaliar, u Riquoma Rq. Laloo heiwa da ya emlang kattu katni ngut ki Executive Member wa ki dkhot ka VDP.
Hei klam yong u Waheh Chnong, da pynsñiawthoob u yei emkaam i khooid i pliah hei im yong i ki bru khamtam heini ipor, wei kammon u yada nei poor uni u khñiang khlam. Da e yaroh u yaka Village COVID-19 Management Committee dei kyrchaan borbah ka Executive Committee ka chnong yeiwa da ye ki u pynphet ya ki kaam chaphrang. Neitæ won pynbood u deiwa ong wa lada ym em kiwa yah khmat yaka VDP kam kini kiwa chynna jngai, ym johkhe u leh ya kani ka Yearlong Cleaning Drive heiwa ka phang leh toh kawa sñiawsuk hadooh kattæ kattæ. Da e khublei u leh ya waroh ki dkhot ka VDP, nadooh u President, Secretary yong ka, heijooh ipor ki dkhot ki para krehkaam chnong kiwa yachim bynta lang.
Hadien wa da pynbna wa da sdang ya ka pynkhooid, da booh ya ki tin wow noh yei jhep khian ha ki thaw wa yoo emkaam u booh. U General Secretary ka chnong da e khublei u ya waroh weiwa da kyntu yei yakrehlang kiwa chong chnong waroh. Pynbood wan i li uiñ ki dkhot cha waroh ki bynta ka chnong wow kbai ya ki chong chnong yow leh yeiwa toh u leh.
Da phah ya kani ka khubor da u Rijukki Rymbai, Vice President, VDP Panaliar, Jowai.
