Hadien 4 sngi wa em bait palat 60 hjar ngut kiwa chah ktah ha u COVID-19 ha ri India, ynne da hiar cha 53,601 ngut katkam ka yukheiñ ka Ministry of Health and Family Welfare.
Na kini kiwa dang chah ktah; 47,746 ngut toh kiwa dang chait, 871 ngut kiwa dang yap katwa kiwa dang em ya uni u khñiang da ku ki da 4,984 ngut.
Ki jylla wa boon dooh kiwa chait toh ha Andhra Pradesh 6924 ngut, Maharashtra 6711 ngut, Tamil Nadu 6037, Karnataka 5218 ngut, Uttar Pradesh 4074 ngut wa ha West Bengal 3208 ngut.
Ka Maharashtra kawa man ka jylla kawa chah ktah dooh hapoh ka ri, da man ko leh kawa nyngong wa tam 5 lak ngut kiwa yoh COVID-19 kiwa em 5,24,513 ngut heiwa da chait 3,58,421 ngut wa 18,050 ngut kiwa yap.
Ka Tamil Nadu kawa man ka jylla wa ar wa chah ktah dooh, ynne da tam ko 3 lak ngut kiwa yoh COVID-19 deiwa em 3,02,815 ngut heiwa da chait 2,44,675 ngut wa 5041 ngut.
Katkam wa pyntip ka sorkar pyrdi, 80% kiwa yoh COVID-19 em ki ha ki 10 tylli ki jylla wa chah ktah dooh hapoh ka ri.
Ha waroh kawi ka ri, kiwa chait da em ki 69.80% iwa ku naka 69.33% kiwa em 15,83,489 ngut; kiwa dang em ya uni u khñiang da em ki 28.21% iwa hiar naka 28.66% kiwa em 639,929 ngut katwa kiwa yap da em ki 1.99% kiwa em 45,257 ngut. Waroh da em 22,68,675 ngut kiwa da dep yoh COVID-19 ha India.
Kiwa chait da tam ki da 9,43,560 ngut ya kiwa dang em ya uni u khñiang iwa ku da 42,762 ngut nadooh ynnin ka sngi.
