Shillong: Ka Hynniewtrep Youth Council (HYC) da dawa ko na ka sorkar wow pynsangeh chwa yei khut thap kaam ha ki 13 tylli ki post Child Development Project Officer (CDPO) yong ka chnat Social Welfare ka jylla, wei da dawa leh wa ha i thaw wow thap ya ki bru thymme, toh wow pynku kyrdan ya ki Lady Supervisor kiwa da kreh chwa ha katai ka chnat.
U General Secretary ka HYC, u Roykupar Synrem da pyntip u wa ka seiñ da dep leh ki da ka RTI ha ki snem wa da dep hajrong ka kaam Lady Supervisor (LS) kiwa pynkrehkaam yaka Integrated Child Development Service (ICDS), wei ha itai i por, da chem wa ki 222 ngut ki Lady Supervisor, da haap ki wow pait ya palat 5000 tylli ki Anganwadi Centre, tangwa neiliang ka chnat Social Welfare ha ka RTI da pynsñiaw ko wa ym em i pynku kyrdan ya ki Lady Supervisor cha ki CDPO, tangwa katkam ka yutip wa da yoh naka sorkar pyrdi, da phah yaka sorkar jylla wa toh u chna chwa ya ki kyndon wow thap kaam ya ki LS deiwa wa pyntip leh wa ki em ki ka hok wow ku kyrdaan kam ki CDPO lada lait i kaam.
U Synrem da pynsñiaw u leh yei phylla wa ka sorkar jylla ym pu ye ko wow chna yaka Service Rule wow pynku kyrdan ya ki LS kam ki CDPO.
Da ong wa ka seiñ hadien wa yoo ko yei thmu yong ka sorkar wow thap kreh ya 13 ngut kam ki CDPO, da lai ko wow dawa na u Montri ka Social Welfare, u Kyrmen Shylla wow pynsangeh chwa ya ini i thmu thap kaam CDPO neibhah wa ka Service Rule ym pu em ko wow pynku kyrdan ya ki Lady Supervisor wei da dawa leh wow wanrah noh ya ka Service Rule khnang wa ki LS ym dooh ya i hok yong ki.
Hawa yaklam wa u Kyrmen Shylla, da pynsñiaw u wa da dep wow yaklam wa ki sahep yong ka chnat wei da kular u leh wa ym knieh ya i hok ki Lady Supervisor lada toh hok wow chah pynku kyrdan ki, deiwa ong leh wa ka chnat daw lai ko katkam ki kyndon wa da booh da ka sorkar pyrdi hajrong ini i rukom thungkaam. Da pyntip u leh wa ki kyndon na i por cha i por kylla ki wei ka chnat daw thooh ko ya iwa da phah ka sorkar khlem da knieh ya i hok yong kiwa toh u yoh.
