Ka Khasi Students’ Union War Jaiñtia Circle ynne ka sngi da lai ko cha ka yalang wa kiwa kitkaam Elaka, kitkaam chnong wa da khut da ka Sub Divisional Officer (Civil) Amlarem ka J.U. Kharpuri hajrong i yoh psiah ki baar jylla hapoh ka Electoral Roll hapoh 7-Amlarem Constituency.
Ka seiñ da ujor ko ya ini i yoh psiah ki baar jylla ha ki Electoral Roll nadooh u snem 2015 wei ka seiñ ym em chong klikti ko hadooh katni wei dang booddien khnang wa ki bru wa na baar ym yoh ki wow muchlia næ chong buhai chnong pyrchah yaka aiñ hadien habood kawa daw ktah yaka riti dustur kawa kheiñ kyntang hapoh ka Bri U Ynñiawtrep.
Ka seiñ ha ka 23 tarik uni u bnai da lai ko wow ujor cha ka SDO (Civil) wa kammon kini ki baar jylla dang boon kiwa yoh Epic Card hapoh 7-Amlarem Constituency, tangwa neiliang yong ka da e yumut ko wow khut ya kiwa kitkaam chnong wow chong pyrkhat hajrong ini neibhah ini ym toh iwa chong du haka samen, neibhah ki Waheh Chnong toh kiwa e Certificate wow pynsakhiat.
Ynne ka sngi da wan cha kani ka yalang nadooh u Dolloi Elaka Jowai, Dolloi Elaka Amwi, Dolloi Elaka Satpator, Dolloi Elaka Nongtalang, Dolloi Elaka Darrang, ki waheh chnong na Bakur, Muktapur, Lakroh, Lai Lyngdoh, Amsarim wa ki Secretary Elaka wa ki chnong deilang wa kiwa yakhmat yong ka seiñ.
Neiliang ki waheh chnong kamjooh ki Dolloi da mynjur ki yei dawa ka seiñ wow pyndam noh ya i pyrtuid ki baar jylla kiwa yoh Epic Card ha ki chnong ki yong ki wei da kular leh wa neini chakhmat wow bichaar wei paitbniah ya kiwon kiwon ki baar jylla kiwa wan psiah chapoh ka chnong ka thaw wei ym e laad leh yaki wow man tre chnong kamjooh wow embynta ha ka synchaar khaddar hapoh chnong pohthaw.
Ka seiñ da pyntip ko leh wa katkam ka RTI wa da yoh ha u snem 2015 da chem wa ki baar jylla kiwa yoh Epic em ki 27 ngut tangwa katni won da yoo wa da boon ki baar jylla wa em pyrtuid hapoh ka Electoral Roll.
Kamtæ da kyntu ya kiwa yahkhmat chnong wow man ki kiwa paitbniah bha ya ini i kaam.
Ka kyrwoh na u General Secretary ka seiñ u Lurman B. Talang.
