Shillong: Ka yaw wa tip kam ka SMB Market Complex wa em ha Polo, Shillong kawa da chna yow e thaw salan ya kiwa chong dai wa kiwa tyrwa tiar cha sarok, kiwa chongdai cha luti syngkieñ ha yaw Polo Bazaar, da wai yaka ynne ka sngi da u Hamletson Dohling, uwa man u montri ka chnat pynroi sor ka jylla hei emlang u A.L Hek, uwa man u montri ka chnat i chait i khiah, u Adelbert Nongrum, MLA ka thaaiñ chirup wa ki sahep ka Shillong Municipal Board deilang waka Urban Affairs Department.
Kani ka yaw toh kawa da pynlait poisa ha u snem 2010-11 hei dor wa T. 21.41 klur wei ya kani ka yaw da chna hei thaw wa heh 3000 sq.m heiwa da em 297 tylli ki dukan wa kawi ka thaw dai baam (Food Court). Yaka poisa da e daka Ministry of Housing and Urban Affairs, Government of India wei da pynkreh yei kreh da ka National Buildings Construction Corporation Ltd.
Hawa e yei klam u Hamletson Dohling da ong u wa i wai ya kani ka yaw man i iwa da angnood da slem wei hanlada da mang ya ka poisa nadooh u 2010-11, neidaw wa em ki mukotduma da kiwa chong dai kamtæ da slem noh i kreh. U Dohling da pyntip u leh wa ka sorkar da booddien ko ya kiwa boon ki kaam wa sahteiñ hapoh ka chnat Urban Affairs Department iwa da wanrah yei chna pyndep ya ka thaw noh-jhep ha Tura wa Nongpoh kamjooh leh ka ISBT ha Tura.
Da pyntip u leh wa i kylliang ya ki tiar thang jhep ha Marten wa i thaw noh ya ki jhep dawai (Bio-medical Waste) wa kiwi kiwi ki kreh ha kani ka thaw dang man i iwa lai bait.
Chooh chooh da ong u wa T. 75 klur da pynlait neibynta wow chna ya ka yaw thymme ha Polo harood kani ka Market Complex wei da yooluti wow pyndep yei kreh hapoh 3 snem.
Neiliang u AL Hek da ong u wa kani ka Market Complex toh kawi na ki kaam wow pynmiat ya ka Polo deiwa kyntu ya waroh wow pynneh yei khooid ha ka.
Ha kani ka yalang da ekti leh ya ki soskular wa ki chabi cha kiwa chong dai ha kani ka Complex.
