Ynne ka 16 tarik man ko ka lyngkhooh sngi yap wa 2 yong u montri rangbahdooh ka ri, u Atal Bihari Vajpayee uwa man uwi na ki montri rangbahdooh ka ri uwa maya ki paidbah wot hadooh ka liang pyrchah ha Parliament leh burom ko ya oo.
Ya u Vajpayee da kha ha ka 25 Kmaichonglad (December) 1924 ha Gwalior, Madhya Pradesh wei da khlaad u ha ka 16 Naisaphra 2018 hei rta wa 93 ha nongbah New Delhi.
U Vajpayee da pyndep u ya ka BA hei ktien Hindi, English wa Sanskrit na Victoria College, Gwalior katwa ya ka MA ha ka Political Science na DAV College, Kanpur. Da jooh embynta u leh yei yakhun laitlooid namo ka Quit India Movement wei da jooh chah kem u leh ha ki bor ka sorkar pharæng.
Ha ki kaam saiñ hima da man u kam u National Secretary ka Bharatiya Jana Sangh kawa man kawi na ki seiñ saiñ hima kawa yatoh wa ka RSS. Da man u kam u National President ka Jana Sangh ha u 1968 katwa ha u snem 1980 da embynta u wow sdang noh ya ka Bharatiya Janata Party heiwa da man u leh kam u President wa nyngkong dooh yong ka.
Ha u snem 1977 heipor wa man u kam u Montri ki kaam baar ri (Minister of External Affairs) da man u uwa nyngkong dooh wow e klam ha ka United Nations General Assembly dei ktien Hindi.
U Vajpayee da man u kam u montri rangbahdooh ka ri (Prime Minister) le sien, ha u snem 1996 heiwa da man u kam u montri rangbahdooh ka ri du 16 sngi, ha u snem 1998-1999 heiwa ka sorkar yong oo da neh ko du kamwa 13 bnai donhi, katwa ka sorkar yong oo da neh ko hadooh wa kut ka samoi yong ka, itæ nadooh u snem 1999-2004.
Hapoh i synchaar yong u Vajpayee ka India da sakhi ko ya ka Pokhran Test ha u snem 1998 heiwa da tympdung ko ya ki Nuclear Bomb ha Pokhran, Rajasthan; da soi ya ka Lahore Declaration ha u 1999 heiwa ka sorkar da yaklam yasuk ko wa ka Pakistan wei da sdang leh ya ka Delhi-Lahore Bus Service.
Chooh chooh ha u snem 1999 ka India da yaleh ko ya ka thma Kargil pyrchah ya ka Pakistam heiwa u montri rangbahdooh ka Pakistan, u Nawaz Sharif da hukum u ya ki chipai yong oo wow randien noh ki.
Ha u 2001 hapoh i synchaar ka sorkar u Vajpayee, ki damok dieñ suloi ka Pakistan da hiar thma ki ya ka Parliament, da jia leh i awri niam ya kawa tip kam ka Gujarat Riot.
Ka sorkar u Vajpayee da sdang ko leh ya kiwa boon ki kaam pynroi kiwa kynthup nadooh ka Pradhan Mantri Gram Sadak Yajana (PMGSY), ka Sarva Shiksha Abiyan (SSA) wa kiwi kiwi.
Ynne ka sngi kawa man ka lyngkhooh sngi yap yong u Vajpayee, kiwa boon ha ka ri da kynmoo warom ki ya oo heiwa u President ka ri, u Ram Nath Kovind da wai u ya i dur sahnaam u Vajpayee ha yung khrekaam wa khliehdooh namo ka Headquarter ka Indian Council for Cultural Relations (ICCR).
U montri rangbahdooh ka ri, u Narendra Modi da lai booh syntu u ha Sadaiv Atal.
Neiliang u montri rangbah ka jylla, u Conrad Sangma da kynmoo warom u ya u montri rangbahdooh ka ri deiwa booh ya i dur u (T) Purno A Sangma chirup wa u Vajpayee ha ki Social Media.
