Jowai: Ka yaw ya dai ya thied Online watip kam ka omechan.com da wai paidbah yaka ynnin ka sngi da u MLA ka 2-Jowai Constituency u Wailadmiki Shylla hei emlang u General Manager District Commerce & Industries Centre West Jaintia Hills District u P.Toi, u President ka SURE u H.H. Mohrmen wa ki kattu katni ki bru waheh haka yalang wa pynlai da u D. Gatphoh ha Infinity Conference Hall.
Heiyatoh wa kani ka yaw, neiliang u tre wa pynlai yaka u Russel Nongrum da pynsñiaw u yei lai luti yong oo hadooh wa poi ha kani ka thong, hawa da chem heipor wa em ka Lockdown deiwa em ka laad dai Online da yarap kow wow pynpoi marbam mardih cha yung ki bru kamtæ da chim u wow sdang yaka omechan.com hei wow wailaad yaki bru ka thaaiñ Ri-loom Jaiñtia u yoh ki wow pynlai yaw yaki mar baam, ki tiar wa chna wa thaiñ ki.
Khana haroh u wa lyngba i yachem yumut u wow P. Toi General Manager DCIC da yoh laad u wow tipmit yaki bru kiwa em i sap wow pynmih mar baam wei chna yaki tiar wa boonjait.
“Ka Laskeiñ Block toh kawa boon bha ki bru wa chaniah u pyndap pynbiang yaka yung ka sem lyngba ki Exhibition, ki Trade Fair wa jooh pynman haki District, haka jylla wa wot chabaar jylla neibynta u pynlai yaw yaki mar yong ki, tangwa hadien wa wan kani ka khlam da man i diaw i kutlad ya ki,” ong u P.Toi.
Kamtæ yooluti u wa lyngba kani ka rynsan da man i wailaad yaki wow yoh ki u pynlai yaw biang yaki mar yong ki neibynta u dap u kot ka yung ka sem.
U kongsan yong kani ka sngi u Wailadmiki Shylla kam uwa mihkhmat naka 2-Jowai Constituency hawa e yei klam, pynsñiaw u yei kmen wa mih kam kini ki bru wa chemphang u chna khih daki yaki hi nalor wow e khih leh ya kiwi.
Kamtæ kyntu u leh ya kiwi won ki khon khynroo wym toh u yooluti bait du yei khih sorkar tangwa toh u mih ki chakhmat u thooh ki laad ki luti wa kammon u chna khih.
