Ka seiñ kiwa chongdai madan kawa tip kam ka Meghalaya & Greater Shillong Progressive Hawkers & Street Vendors’ Association (MGSPHSVA), kawa man leh ka seiñ kawa heh dooh kawa da dep leh yaka Register kiwa chongdai madan ha Meghalaya, da sang ki wow wai hi yei khih yong ki ha Shillong deiwa bood yaka Social Distancing, yaka kyndon Odd wa Even kamjooh i por wa da booh.
Deiwa kheiñ ya u Number wa khaddooh yong ka Membership ID Number, da yabhah yaki hapyrdi ki Odd wa Even. Yaki dkhot da e daka ID da ka Association kiwa ki dkhot daw deiñ ki heipor wa leh ki yei kaam yong ki. Ki ID wa kut ha u 0,2,4,6,8 u chondai ki haka Monday, Wednesday wa Friday katwa kiwa em ya u ID Number wa kut ha u 1,3,5,7 wa 9 u chongdai ki haka Tuesday, Thursday wa Saturday.
Ynne ka 18 tarik da sdang ya ini wow chongdai biang deiwa bood ki yaka kyndon ha ki thaw wa chongdai ki ha Khyndailad, Motphran, Bimola wa GS Road. Wei da rah ki leh yaki kot rben (Placard) wa klam chaphang i eh i khoo wa yachem ki.
Ka MGSPHSVA na ki por cha ki por da dep lai e dorkhat ko cha ka sorkar khamtam wa yatoh ha kini ki por wa em ka khlam yow lait ki wow yap thngan. Ka Association da pyntip ko leh cha ka sorkar wa daw kitkhlieh ko du ya kiwa chongdai madan kiwa mana ki dkhot wa paka kiwa da em pyrtuid leh haka thup wa da e cha ka sorkar waka High Court ka Meghalaya.
Ka Association da kyntu ko cha ka sorkar yow pynkrehkaam noh yaki aiñ ka sorkar pyrdi heiyatoh wa kiwa chongdai madan, yow pynlait leh yaka poisa wa e yarap T. 700 chi tayaw kawa toh u wan hei le bhah kawa ym pu em yoh ki hadooh kattæ.
