Neidaw wym bood ki paidbah ya ki kyndon yada na u COVID-19 deiwa yanjngai uwi na uwi, u deiñ ya ki Mask wei wow man kiwa lehkhooid ya ki kti ha ki thaw wa pynman yaw ha Police Bazaar wa Motphran, neiliang ka District Magistrate ka East Khasi Hills da phah khang ko ya waroh ki dukan ha kini ki thaw hadooh wa pynmih hukum da kamwi.
Neiliang ka District Magistrate da ong ko wa da leh ya ini neidaw wa ini wa leh ki bru toh iwa tyngkheiñ yaki hukum (Prohibitory Order) wa da pynmih haka 15 tarik uni u bnai.
Kamtæ ha Police Bazaar da phah khang ya waroh ki dukan, ki thaw chongdai, ki thaw pynman yaka khayi pateiñ nadooh na Khyndai Lad lyngba ka Gold Cinema hadooh ha Umsohsun Road Junction wa ha G.S. Road nadooh Shani Mandir hadooh Bimola Point.
Ha thaaiñ Motphran da phah khang ya waroh ki dukan, ki thaw chongdai, ki thaw pynman khayi pateiñ nadooh na Motphran hadooh Bimola Point, na Motphran hadooh Stand Jeep wa ka MUDA Parking Lot (Upper Level) kawa em ha Garikhana.
Ha waroh kini ki thaw da khang leh wow pynman ya ki yalang paidbah kamjooh ki yung krehkaam sorkar wa ki yong ki bru samen.
Kam wow pynkynmoo wa ini wa dep da pynmih hukum ka DC ka East Khasi Hills wow sdang noh wow wai ki dukan man-ka-sngi ha thaaiñ PB hadooh Motphran.
