Shillong: U Montri wa pait ya ka chnat ka chait i khiah, u Alexander Laloo Hek ynne ka sngi da lai pait u ya i jia wa da chah khang næ pynman kam ki Micro Containment Area ha ka thaaiñ Rilbong wa ha Jhalupara. Ha kani ka sngi da emlang leh u MLA ka South Shillong, u Sanbor Shullai, u Director of Health Services (MI), u Dr. Aman War wei kamjooh na ki bor pynlai District.
Kamwa da man hadooh kattæ na katai ka thaw da em palat 40 ngut kiwa chong chnong kiwa em ya u COVID-19, wei ya kini waroh da yah cha ki Corona Care Centre, katwa ya ki yung wa ki kyntoit da khang sbak chipor yow lait na i maa nei poor ka khlam.
U Hek da ong u wa i lai sylli ynne ka sngi toh yow tip yei long i man kani ka thaw wei ka rukom booh ya ki Micro Containment Zone, deiwa pyntip leh wa da dep wow leh ya ka Random Testing ya palat 700 ngut. Da pyntip u wa na kitai kiwa em ya u khñiang COVID-19, waroh man ki kiwa ym em chitom (Asymptomatic).
U MLA ka South Shillong, da pynsñiaw u yei sñiawngooh ya i chimkhia yong ka chnat i chiat i khiah hajrong i kyntu yong ka chnong wa emkaam wow leh ya ka Random Test wa ya u Montri wa da lai hi da idæ wow pait ya katai ka thaw.
Da ong u wa i emkaam yong ki paidbah ha kitu ki thaw wa da chah khang toh i baam, heiwa neiliang u MLA da kular u wow e leh yei yarap da ki marbaam cha ki bru kiwa da chah ktah.
Neiliang u waheh chnong da pynsñiaw u yei sñiaw burom ya ka sorkar kawa da kular wow yarap ya iwa emkaam, wei ha i jooh i por da kyntu leh ya ka chnat i chait i khiah wow phah lang da ki pulit wow sonteri ya ki thaw wa da pynbna kam ki Containment Area neibynta i chngaaiñ ki paidbah.
