Shillong: Neidaw wa em wa yoh COVID-19 kamjooh wa em kiwa em hei maa wow yoh ya uni u khñiang kamjooh yow ye u leh yeiwa emkaam yow yada yaki paidbah deiwa leh yei booddien (Contact Tracing), Quarantine, Testing wa kiwi kiwi. Neiliang ka District Magistrate ka East Khasi Hills da pynbna ko ya kini ki thaw ha wah kam ki Containment Area yow khang yei psiah i mih ki bru cha kini ki thaw khlem da yoh bor.
Ka Naz Hotel wa Grace Hotel Complex ha Bimola Point, Sweeper Colony, Mawlonghat u man ki kam ki Containment Area nadooh ka 20th August, 2020.
I yung ka S. Syiem ha New Kench’s Trace, i yung ka D. Lamin ha Riat Laban East, Madan Laban, i yung u L. B. Rapthap, iwa em pyrchah yaka Benz Residency, Central Bishnupur, i yung u Nirbor Kharkongor waka Rikynti Kharkongor wa em ha Mynsain Neng, Upper Lumparing u man ki kam ki Containment Area nadooh ka 20th August, 2020.
I Lovely Store wa em ha Malki Point, Malki u pteiñ i wow man kam i Containment Area wa i yung u Martian Mawthoh wa em ha Riat Bharat, Malki Nongshiliang.
Ha waroh kini ki thaw da khang yaki paidbah wow psiah ki cha ki kamjooh kiwa em hapoh kini ki thaw wow neh bait ki hapoh yung.
Da khang wow pynman ya kiwon kiwon ki yalang paidbah, u wai ki dukan, ki yung krehkaam sorkar kamjooh ki yong ki bru samen. Ya iwa emkaam daw pynbiang da ki bru ki bor pynlai District.
Kani ka hukum ym em khang ko ya ki wakreh ha i chait i khiah, ki laad pathai khubor, ki wakreh ka Shillong Municipal Board, ki Petrol Pump wa kiwa libooh kum LPG.
Ya kiwa leh pyrchah daw pynchitom katkam ka aiñ Disaster Management Act, 2005 waka IPC.
