Jowai: Ka Seiñ Kyntu Seiñ Raij 12-Daloi da e khublei Behdiñkhlam ko ya waroh ki khon ki hajar yong ka Seiñ Raij Mukhla kiwa chong wa sah ha kylleiñ ki thaw hapoh ka jylla Meghalaya.
Kamwa da ya tiplang waroh wa ka Seiñ Raij Mukhla toh ka Seiñ Raij kawa pynman yei leh Niam ya ka Behdieñkhlam kawa khaddooh hapyrdi ki Seiñ Raij waroh, wei ha uni u snem leh da pynman ya ini i leh Niam Behdieñkhlam nadooh ka 22 hadooh ka 25 tarik u August 2020 ha ka Biar ka Seiñ Raij Mukhla ha Mukhla Nongrim.
Neiliang yong ka Seiñ Kyntu Seiñ Raij 12-Daloi da booh ko ha i duwai wa hapoh kini ki 4 Sngi le yaw wa u Blai wa booh wa thaw u kær wei wow ri wow sumaar u ya waroh ki khon ka Seiñ Raij Mukhla wei kamjooh leh ya ki Seiñ Raij waphær kiwa em hapoh ka ri ki 12-Daloi wa ka ri ki Lephaw Syiem yow yoh ki ya i doh i pran wa chait wa khlan wei yow biang ka kamai kajih.
Kamtæ ka Seiñ Kyntu Seiñ Raij 12-Daloi da yooluti ko wa hadien wa da dep u pynman ya kini ki leh Niam Behdieñkhlam da waroh ki Seiñ Raij waphær waphær wa u Blai Tre Kynrad leh u beh u pyndooh pyndam u chi syndon ya ka khlam COVID -19 kawa da ktah lut ya waroh ki ri yong ka pyrthai wei wa kani ka khlam COVID -19 u wiar noh ko na kani ka ri wa kyntang ki Blai yong i, wei ha i jooh i por leh wa kani ka leh Niam Behdieñkhlam u man ko kawa phooh wa phieñ wei kawa jop.
Ini toh katkam ka kyrwoh na u S. Sari, Publicity Secretary ka SKSR 12-Daloi.
