U District Magistrate ka North Garo Hills District, Resubelpara da pynmih hukum u haka 19 tarik wow pyndam chwa yei pynman yaka yaw wa chisien chi tayaw kawa jooh pynman haka sngi Saturday ha Resu Bakrapara.
Da ong u leh wa ya ini da kyrpaad da ka Bazar Committee ka Resu Bakrapara neidaw wa chem chitom wow pynryntih yaki paidbah heipor wa pynman yaw yow bood ki yaki kyndon yada na u COVID-19 deiwa leh yaka Social Distancing kamjooh leh ym dam u yakhleh wa kiwa khayi kiwa wan na Assam.
Da pyntip wa ini i khang toh du yei pynman yaka yaw wa chisien chi tayaw katwa ya kiwa em yaki dukan wa pura ha kani ka yaw u wai hi ki Monday hadooh Saturday kamwa jooh.
Heiyatoh won waka yaw Mendipathar Bazar, u District Magistrate ka North Garo Hills da pyntip u wa neidaw wa em ki 3 ngut kiwa yoh COVID-19 ha Namabosti ha i bynta wa em cha chilliang Assam ka yaw Mendipathar, da khang ya ki bru wa na Meghalaya wow lai chei liang ka Assam.
Hanla kani ka yaw em ko chiteiñ cha Assam, da kyntu ya ki paidbah wym toh u yajan wa ki bru wa na Assam.
Ya ki wakreh sorkar kiwa sah yung wai chei liang ka Assam, lada ye wow kyrriah ki chei liang ka Meghalaya kamjooh ya kitu kiwa khayi, kiwa em dukan wa pura ha Meghalaya da phah ya ki wow sah ha Meghalaya ha kini ki por wa em ka khlam.
Lada ki wakreh sorkar ym ye ki wow sah ha Meghalaya neidaw wa ym yoh yung wai, da phah ya ki wa ym toh wow yakhleh wa kiwi kiwa em neiliang ka Assam i bynta ka yaw Mendipathar.
