Hadien wa ka chnat i chait i khiah ka sorkar jylla da e por ko ya kiwa lai puræ Doctor da i bhah wa i kyrchaan ka sorkar wow wan mih ki cha ka Directorate yow kreh ki waka sorkar, neiliang u DHS (MI) u Dr. Aman War ynne ka sngi da pyntip u wa da em ki kattu katni ki Doctor kiwa da wan mih cha ka Directorate kiwa da pynsñiaw wa smat ki wow kreh waka sorkar wei da em leh arngut kiwa da su yaka Bond yong ki.
Katkam wa pyntip u DHS kiwa da lai mih cha ka Directorate kiwa boon toh naka ST Category katwa kiwa boon naka Open Category duna ki lait noh uwi uwa naka chnong Mairang wei neiliang u DHS da maham eh u ya kitu kiwa lehstiñ ki wym bna yei emkaam ka sorkar wei hadien kani ka 31 tarik daw pyntip noh cha ki pulit wei daw phah leh yaka Notice kawa eh wei daw thooh leh ya ki thaw sah ki yong ki.
“Ynnin da em kamwa 10 ngut kiwa wan, boon hi kiwa em hapoh ka Khasi, Jaiñtia wa Garo Category ki ST/SC toh kiwa boon kiwa da wan kreh tangwa kiwa yoh naka Open Category kiwa boon toh kiwa ym pu wan wei daw e noh yaka chithi kawa daw e lang cha ki SP ki thaw wa em ki, tangwa i thaw sah (Address) wa da e ki heipor wa lai puræ ki, ym em de ki ha itu i thaw sah wei da hap wow thooh ya ki na ki College wa pyndep ki yei puræ wei lada ym wankreh ki, daw hap ki wow su yaka Bond,” da ong u DHS.
Chooh chooh da ong u wa lada ym su ki, daw pynchitom katkam ki kyndon wa da soi ha ka Bond wei lada ym chem ya kini ki bru daw e noh daka FIR.
