Hadooh ynne 10 waje i step ka 28 tarik, hapoh jylla Meghalaya kiwa dang yoh thymme ya u COVID-19 da em ki 73 ngut wei na kini ka District wa em wa yoh boon ngut dooh toh ha East Khasi Hills heiwa da em 35 ngut (33 ki bru paidbah wa 2 ngut ki bru chipai), bood won sa ka East Garo Hills wa da em 32 ngut ki bru paidbah, North Garo Hills 3 ngut ki paidbah, West Khasi Hills 1 bru paidbah wa ha East Jaiñtia Hills 2 ngut ki bru paidbah.
Kiwa dang chait wot em ki 7 ngut wei waroh kini toh kiwa na East Khasi Hills ki bru paidbah suda.
Kiwa dang em ya uni u khñiang ha ki District man ki kamni ha wah:
East Khasi Hills-874 (ki bru paidbah-590, ki bru chipai-284)
West Khasi Hills-44
South West Khasi Hills-0
Ri Bhoi-68 (ki bru paidbah-62, ki bru chipai-6)
West Jaiñtia Hills-2
East Jaiñtia Hills-14
West Garo Hills-187 (Ki bru chipai-114, ki bru paidbah-73)
South West Garo Hills-3
South Garo Hills-11 ngut ki bru chipai
East Garo Hills-71
North Garo Hills-13
Hadooh ynne ka sngi kiwa dang chah ktah (Active Cases) hapoh jylla em ki 1287 ngut, waroh kiwa da chait da em ki 906 ngut katwa kiwa da khlaad won em ki 9 ngut wa 17 ngut kiwa da mih napoh ka jylla.
