Shillong: Neidaw wa em wa yoh COVID-19 kamjooh wa em kiwa em hei maa wow yoh ya uni u khñiang ha ki yung wa em ha Malki wa kiwi ki thaw, kamtæ da emkaam wow leh yeiwa emkaam deiwa leh ya i booddien ya kiwa yachem wa kiwa yoh COVID-19 kamjooh leh ya kitu kiwa yachem pateiñ yow phah leh yaka Quarantine, Testing wa kiwi kiwa emkaam yow yada yaki paidbah na kani ka khlam kamjooh wow yoh khang yei psiah i mih cha kini ki thaw wa em wa yoh ya uni u khñiang.
Kamtæ ka District Magistrate, East Khasi Hills District, da pynmih hukum ko haka 27 tarik uni u bnai yow pynbna ya i yung u Wanlamphrang Kharmujai, Umshyrpi, hajan madan Malki, Malki kam ka Containment Area nadooh ka 27 tarik uni u bnai.
Kamjooh leh, ka District Magistrate, East Khasi Hills District da pynbna ko ya ki Quarter No. A4, Quarter No A5, Quarter No A6, Quarter No A7, Quarter No A8 wa Quarter No A9 ki Municipal Quarter ha Bishop Cotton Road kam ki Containment Area nadooh ka 27 tarik uni u bnai.
Ha kini ki Containment Area da khang ya kiwon kiwon ki bru wow psiah cha kini ki thaw wei kiwa em hapoh kini ki thaw wow neh bait ki hapoh yung.
Da khang wow pynman ya kiwon kiwon ki yalang paidbah, u wai ya ki dukan, ki yung krehkaam sorkar kamjooh ki yong ki bru samen. Ya iwa emkaam daw pynbiang da ki bru ki bor pynlai District.
Kani ka hukum ym em khang ko ya kitu ki wakreh ka chnat i chiat i khiah wow leh yei kaam yong ki, ki wakreh ka Shillong Municipal Board, ki laad pathai khubor, ki Petrol Pump wa kiwa li booh kum LPG.
Ya kiwa leh pyrchah daw pynchitom katkam ka aiñ Disaster Management Act, 2005 waka IPC.
