Neiliang ka North Eastern Hill University Students Union (NEHUSU) da thoh ko cha u montri ka chnat puræ puthi ka jylla, u Lahkmen Rymbui hajrong i thmu wow pynman ya ka Final Year Examinations kawa daw booh wow sdang nadooh ka tayaw wa le yong u Naikhynde.
Ka seiñ ki khynnah puræ kani ka skurbah da ong ko deiwa chim yeiwa jia katni khamtam wa yatoh wa ka khlam u COVID-19 wa i rukom ku kiwa chah ktah ha oo aw man ka sngi hapoh jylla, i rai wow pynman ya ka Exam daw ktah bha ko ya ki khynnah, wei hajrong ini da e dorkhat ko leh ha u Vice Chancellor ka North Eastern Hill University nadooh u Naiynñiaw 2020.
Da ong ko leh wa ympu yoh yutip ko hajrong ki luti wa da chim ka sorkar wow pynman ya ka Exam ha kylleiñ ka jylla lyngba ki kor Internet, wei wa i daw wa pyrchah yeini toh wa boon hi na ki khynnah wan ki na ki manyung wa dooh kiwa ymjoh i bor wow pynbiang ya ka Internet wa ka bordiñ.
“I thmu wow pynman ya ka Online Exam daw ktah bha ko ya ki khynnah wa ka mynried yong ki,” da ong ka dorkhat wa da phah cha u Lahkmen ya kawa da soi da u President wa Secretary ka seiñ.
Chooh chooh da kdaw ko wa ki dorbar chnong da phah chongkset hadooh 14 sngi ya ki kiwon kiwon kiwa wan na Shillong khnang wow khang nei poor uni u khñiang katwa kamtæ da kyntu ko ya ki bor ka sorkar jylla wow chimkhia yeini deiwa pynbiang yeiwa emkaam ki khynnah da ki kor wa i bor khnang wow ye ki wow chong yaleh ya ki Online Exam.
Heijooh i por ka seiñ da kyntu ko ya ka sorkar wow pynbiang ya ki WiFi ha waroh ki Block Level, Sub District wa kamjooh ki District khnang wa ym em i thut ya ki khynnah hawa yaleh ki ya ki Exam yong ki.
