Shillong: Neidaw wa em wa yoh COVID-19 kamjooh wa em ki bru wa em hei maa namo ki High Risk Contacts kiwa yachem wa kiwa yoh ya uni u khñiang ha ki yung (Building) wa em ha Kench’s Trace, Oxford Hill wa Rilbong wei yow ye u leh ya iwa emkaam kam wow booddien, i leh Quarantine wa kiwi kiwi yow yada ya ki paidbah, da emkaam wow khangkset ya kini i thaw.
Kamtæ ka District Magistrate, East Khasi Hills District, da pynmih hukum ko haka 28 tarik uni u bnai yow pynbna ya i yung ka Pinki Sharma hadooh i yung u Amit Sharma, Upper Maxwelton Estate, i yung u Nashibi Rai hadooh i yung u Dharmindar Rai, Lower Maxwelton Estate wa i yung (Building) u Dr. Lumlang Jyrwa, Oxford Hill kam ki Containment Area nadooh ka 28 tarik uni u bnai yow khang yei psiah i mih chapoh kini ki thaw khlem da yoh bor.
Ka hukum da khang ko ya kiwon kiwon ki bru wow psiah ki cha kini ki thaw wei kiwa em hapoh kini ki thaw wow neh bait ki hapoh yung.
Da khang wow pynman ya kiwon kiwon ki yalang paidbah, u wai ya ki dukan, ki yung krehkaam sorkar kamjooh yong ki bru samen wa em ha kini ki thaw.
Ka hukum ym em khang ko ya ki bru ka chnat i chait i khiah wow leh yei kaam yong ki, ki wakreh ka Shillong Municipal Board, ki laad pathai khubor, ki Petrol Pump wa kiwa libooh ya ki kum LPG.
Ya kiwa leh pyrchah daw pynchitom katkam ka aiñ Disaster Management Act, 2005 waka IPC.
