Shillong: Ka Committee on Environment wa da thung da ka Meghalaya Legislative Assembly ynne ka sngi da rai ko wow kyrchaan ya i phah khang noh chwa da ka MSPCB ya 15 tylli ki karkhana thang mooyong namo ki Coke Factory kiwa em ha West Khasi Hills District.
Hawa klam cha ki laad pathai khubor, u Chairman ka Committee, u Syntar Klas Sunn da pyntip u wa ya ini i rai da wan ko hadien wa ka Committee da chem ko ya iwa boon na kini ki karkhana toh kiwa da krehkaam khlem da yoh bor na ka Meghalaya State Pollution Control Board (MSPCB), wei da pyntip u wa neiliang ka Board da phah ko leh da ka Notice cha kitai ki karkhana wow khang noh neibhah wa krehkaam ki khlem da yoh bor, wei ini i phah khang ya kitai ki karkhana toh wow leh da ki bor pynlai District wei toh u khang ya kini ki karkhana hapoh 14 sngi nadooh wa da phah ya ki Notice.
U Sunn da ong u wa ka Committee ka kyrchaan ko ya ini i rai yong ka MSPCB wow phah khang ya kitai ki karkhana, wei da kyntu ya ki bor pynlai District wow phah khang ya kitai ki karkhana Coke neibhah wa ktah ko ya ka rymaw wei tyngkheiñ leh ya ki kyndon aiñ wow yada na i pyntngit ya ka um wa ka la-ær soodong.
U dkhot ka Committee, u Himalaya M Shangpliang da ong u wa ini i rai wow phah khang toh neidaw wa ki karkhana ym em yoh bor ki naka sorkar, tangwa da mih ki kam ki tit wow krehkaam khlem da yoh bor khamtam ha ka thaaiñ Shallang wei kawi ka chnong wa da tip kam ka Dorangre kawa toh ka chnong kawa dang yirngam wei da ini i em kini ki karkhana pyrchah yaka aiñ, daw pynsih ko ya ka rymaw ha katai ka chnong kawa toh u pynneh pynsah.
Katkam i chem yong ka Committee, da em du 3 tylli ki karkhana kiwa pynbiang ya ki kot ki sla wei kiwa da yoh bor na ka MSPCB, kitæ ka Shemphang Industries, Ri Lyngam Coke Factory wa ka Karbochem Pvt Ltd.
