Ka Dorbar Chnong Lakroh da pynche ko wa ym em pynbaad ko ya kiwon kiwon ki seiñbhalang heiyatoh wa iwa jia hapoh ka chnong ha ka 05-08-20 ha i por 9:00 waje i miet tangwa beiñ joor ko ya u Sanjay Syndai, u Ferby Syndai, u John Syndai, u Shem Pariat, u Ketme Kynsai deilang wa 6 ngut ki lok yong ki napoh East Jaiñtia Hills kiwa wan psiah yabor khlem da yoh bor na kiwa pynlai chnong.
Da ong wa kini da wanrah ki wa ki tiar pynmynsoo wei hawa ki VDP ka chnong da pyrchang ki wow yaklam wow khanglaad ya ki, da choh da dat wei da taar ki ya ki ID yong ki VDP ka chnong wei da maham da pynkhor ki ya kiwa yahkhmat ka chnong wa kynthup ya u Waheh Chnong u Willy Pohplet wa u Secretary Chnong u Sibil Tariang. Kini ki bru da tim sih tim sang ki hapoh ka chnong khlem iwon iwon i daw.
Neiliang ka Dorbar Chnong da beiñ joor ko ya ini wei da booh ko leh da ka FIR pyrchah ya kini damok ha u Officer In-charge yong ka Muktapur PPP.
Kamtæ neiliang ka Dorbar Chnong da kyntu ko ya ki bor yong ka aiñ wow bichaar bniah wei wow kem syndon ya kam kini ki jaitbru kiwa thmu wot wow chim leh ya i mynsien kiwa yahkhmat chnong neibhah lada kamni chi kamni u jia daw booh ko hei maa ya ka chnong ka thaw wa ya ka thaaiñ hi waroh kawi neibhah wa kam ki bru hei yongsakiat lada em iwon iwon i bakla ym toh i kaam ka dorbar chnong wow chim ya ka aiñ ha ki kti yong ki wei toh u pynbait chwa khamtam paradoh parasnam ym toh wow wan yachoh ya dat næ wan maham hapoh chnong pohthaw.
Ini toh katkam ka kyrwoh na u Secretary chnong u Sibil Tariang.
