Katwa dang mih ki sngi kiwa chah dang ktah ha u COVID-19 ha India da pyntam ki ya kiwi ki sngi heiwa ha kini ki 24 kynta itæ hadooh ynne i step ka 3 tarik, kiwa dang chah ktah da em ki 83,883 ngut iwa man leh i sien wa nyngkong wa tam 80 hajar iwa pynpoi ya kiwa da dep chah ktah palat 38 lak ngut katkam ka yukheiñ ka Ministry of Health & Family Welfare.
Kiwa dang chait da em ki 68,584 ngut, kiwa dang yap da em sa 1043 ngut katwa kiwa dang em ya uni u khñiang da ku da 14,256 ngut.
Kiwa dang chait kiwa boon toh ha Maharashtra 13,959 ngut, Andhra Pradesh 8454 ngut, Karnataka 6287 ngut, Tamil Nadu 5891 ngut, Uttar Pradesh 4687 ngut, Odisha 3303 ngut wa ha Uttar Pradesh 3297 ngut.
Ki jylla won wa boon dooh wa ku kiwa dang em ya uni u khñiang toh Karnataka 3460 ngut, Maharashtra 3182 ngut, Andhra Pradesh 1866 ngut, Assam 1713 ngut wa ha Chattisgarh 1631 ngut.
Kiwa da chait hapoh ka ri da em ki 77.09% iwa ku naka 76.98% kiwa em 29,70,492 ngut, kiwa dang em ya uni u khñiang da em ki 21.16% iwa hiar naka 21.26% kiwa em 8,15,538 ngut wa 1.75% kiwa yap kiwa em 67,376 ngut. Waroh da em 38,53,406 ngut kiwa da dep yoh COVID-19.
Kiwa chait da tam ki da 21,54,954 ngut ya kiwa dang em ya uni u khñiang iwa ku da 54,328 ngut nadooh ynnin ka sngi.
