Ynne i step heipor kamwa 5:00 waje, da em i tyrrah kari hapyrdi kawi ka Truck wa ka Bolero Pickup ha Ialong wei kani ka Truck toh kawa wan naka karkhana pynmih khyndaw-bilat wa em ha East Jaiñtia Hills wei thmu ko wow lai cha liang Guwahati Assam katwa ka Bolero won toh kawa wan na Guwahati wei kawa thmu wow lai cha liang East Jaiñtia Hills.
Hadien ini i tyrrah kari neiliang ki pulit ka Phramer Traffic Cell da poi ki ha ini i thaw wei da rah ki ya kiwa yah kari cha Civil Hospital Ialong wei manda poi ha kani ka thaw sumaar da chem wa uwi na kiwa yah ya ka Truck toh uwa em COVID-19 katkam ka Test wa da leh ha kani ka thaw wei da booh noh ya oo hapoh Isolation Ward.
Hawa yaklam wa u Superintendent of Police ka West Jaiñtia Hills, u Bikram D Marak da pyntikna u yeini i jia wa yoh COVID-19 uwi na kiwa yah ya ka kari.
Chooh chooh da pyntip u leh wa em arngut ki pulit kiwa yah ya kini ki bru cha kani ka thaw sumaar da chong-ket (Quarantine) noh ki wut wut wei kiwi ki pulit leh da phah chongkset ya ki khnang wow ye ka chnat i chait i khiah wow leh yeiwa emkaam.
