Shillong: Ka sorkar jylla ynne ka sngi da mynjur ko wow pynkreh noh yaka Ganol Small Hydro Power Project ka wow pynmih bordiñ 22.5 MW wei i lut u man ko T.507.71 klur, ya iwa da booh wow pyndep ha u Naisaphra u snem 2022.
Katkam wa pyntip u James PK Sangma uwa man leh u Montri wa pait ya ka chnat bordiñ ha i jooh i por uwa e ktien ka sorkar Meghalaya Democratic Alliance (MDA), heiwa yow sdang ya kani ka Project ha West Garo Hills, ka sorkar daw yarap ko ya ka chnat bordiñ lyngba ka State Development Loan T. 50 klur wei da chah leh wa ka chnat u chim ram ko na ki Bank næ ki kynhun wa yarap poisa hadooh T. 173.11 klur.
U James da pyntip u wa da mynjur ya ini i thaw pynmih bordiñ ha u snem 2008 wei ha u snem 2013 da pynku biang ya i dor yong itai i kreh cha ka T. 332.68 klur. Tangwa manda sdang wow pynrkeh ha u snem 2014, da chem wa em i pynkylla heiwa hawa sdang ya i kreh, kamtæ da chem wa hap wow pynku biang ya i dor yong ini i kreh cha ka T.356.43 klur.
Da ong u wa ha u snem 2019 da pynku biang ya i dor yong kani ka Project neibhah wa i ku dor ki mar ki mata, wei ynne ka sngi, ka sorkar da mynjur ko wow pynkreh ya katai ka Project ha i lut wa poi cha T.507.71 klur.
Hawa yatoh wa ini, ka sorkar jylla wa ka MePDCL daw hap ki wow ya soi ya ka soskular, wei ha i jooh i por da pyntip wa ka sorkar ynne ka sngi da thung leh ya ka Committee wow khlieh da u Chief Secretary yow pait wa ka MeECL su tikna ko ya ka ram kawa da chah wow chim nachwa kawa da poi cha ka T.1345 klur kawa da e bor ka sorkar.
