Jowai: Ka Meghalaya People’s United Front (MPUF) seiñbei hapoh i yahkhmat u President yong ka u Dapoiwanmi Laloo, haka 8 tarik uni u bnai da yoh ki wow pynkha ya ka chnat krehkaam wa thymme ya kawa tip kam ka MPUF Women’s Wing West Jaiñtia Hills District.
Ya ka yalang da pynlai da u Publicity & Information Secretary Central Body u H. Bhoi, da yoh ya ki ktien pdiang sñiawbha na u President ka Laskeiñ Block u P. Suiam, hei emlang u Aimonbha Syad General Secretary Central Body wa kiwi kiwi de.
Katwa neiliang u President ka seiñ u Dapoiwanmi Laloo hawa e yei klam da pynsñiaw u ya i thong yong ka seiñ itæ wow burom ya ka ri waka jaitbru wei wow yada ya i khyndaw i chyiap.
Ha i jooh i por da pynsmai u ya kitai kiwa kitkaam kiwa kynthup ya ka President ka Ridaroi Shadap, Vice President ka Ivy Mary Pyngrope, General Secretary ka Balarina Shullai, Asst. General Secretary ka Suk Dhar, Public and Information Secretary ka Nehlang Dhar, Asst. Publicity & Information Secretary ka Yophika Nongrum, ka Chief Organising Secretary ka Yomanroi Nongrum, Finance Secretary ka Alda Nongrum, deilang wa 19 ngut ki Dkhot katwa ya ki kaam wa sah wa dang lait da ekti ha ka President wa Secretary ka MPUF Women’s Wing wow leh ya iwa emkaam.
