Ka BJP Meghalaya Pradesh ynne da ong ko wa hadien wa da pynmih pyrthai ko ya i rukom baam-tooh ha ka GHADC wa JHADC, da ong ko wa ym phylla ko wow yoo ya kiwa yahkhmat wow lai sait-kti ki.
Neiliang ka BJP da ong ko wa kwah ko wow pyntikna ya ki paidbah wa da pynmih pyrthai ko yeini hadien wa yoh ko ya ki sabut wa biang wow pynsakhiat yeini i baam-tooh wei ya kini ki jooh ki kot da ekti ha kiwa pathai khubor leh kamjooh deiwa pyntip leh wa daw kyrpaad ko wow takit ka CBI hajrong ini i kaam.
Da ong ko leh wa da em ki sabut wa ye ki paidbah u pait heiwa kamwa 50% ki kreh wa da leh ka GHADC toh du ha i kot donhi heiwa da chna ya ki yingkieñ lai-kjat.
Ka BJP da chem ko leh yei pynnemkaam bakla ya ka poisa ki Executive Member ka JHADC heiwa da su ya ka tulop ki wakreh heithaw wow yoh myntoi ki paidbah deiwa pynrap wa hadooh T. 20 Klur da pynemkaam ya ka chawi. Da kylli ko leh lada kamni, i chim ram wa khlem yohbor heiwa da kam wa manda yoh na ka sorkar daw su won ya kani ka ram. Da chah mo wow leh kamni? Man i iwa chah ka aiñ mo leh kamni? da kylli ka BJP.
Heiyatoh won wa i dawa hiar chuki ya u President ka Party, u W. Kharlukhi wa ym em bor u wow klam heiyatoh wa i kaam pohyung ka Party (National People’s Party), nyngkong ka BJP da ong ko wa emkaam wow tip yi wa em ha ka sorkar synrop NDA, wei manda pyndep takit ka CBI wei wa chem wa em sakhiat i baam tooh hapoh ki Council emkaam ya u Kharlukhi wow ieh kaam u kam u State Party President kamjooh leh kam u Rajya Sabha MP.
Heijooh i por ka BJP da ong ko wa ym ye ko wow pdiang ya ini i baam-tooh neibhah wa ya ka BJP ki paidbah wa em haphrang, wei ym kwah ko wow chna sorkar ha iwon iwon i bynta lada man i neibynta i kaam baam-tooh.
