U Samlin Malngiang uwa man u Montri ha ka sorkar jylla kamjooh leh u MLA ka Hills State People’s Democratic Party (HSPDP) na Sohïong, da ong u wa da ieh u ha ki heh ka party wow pynbait yei kylliang chuki ka sorkar wa u Renikton L Tongkhar, deiwa pynche leh wa nadooh wa sdang ym em iwon iwon i yaklam namo ka soskular wow pynbait wow kylliang chuki ki montri mar chiteiñ ka samoi hapyrdi ki 2 ngut ki MLA ka Party.
U Samlim da ong u wa nadooh wa sdang ym em iwon iwon i yakut namo ka soskular hajrong ini (wow kylliang montri mar chiteiñ samoi) neibhah wa da smai u kam u Montri heipor wa ym em President ko hadien wa ieh u Ardent M Basaïawmoit deiwa pynrap leh wa heipor wa smai u kam u Montri da em i yaklam dei ktien na u Renikton wow elaad ya oo wow yoh u wow man kam u montri ka sorkar.
Chooh chooh da pynrap u wa nadooh wa ka Party da jop ko ar ngut ki MLA, waroh ar ngut da lai ki cha u President warim wow yoh yumut ya ki kaam wow leh chaphrang heiwa neiliang u Ardent uwa man kam u President ha kitu ki por da ong u wa emkaam wow lai bait wa ka UDP ha ka Regional Democratic Alliance (RDA), wei lada em ha ka sorkar, u Samlin u man u kam u montri neidaw wa da jooh jop chwa u ha ka Election MDC ha u snem 2016.
U Samlin uwa man leh uwa yahkhmat ka HSPDP, da ong u wa i kaam wow kylliang montri ymtoh iwa da wanrah da ka Party nadooh wa sdang, wei katni chong i ha ka rai hi ka Party waroh kawi.
Da pyntip u leh wa ha i por wa u President, u KP Pangniang da lai u wow yachem hajrong katai ka phang, kam u MLA ka Party da pynsñiaw u yaka yurim yong oo deiwa pynsñiaw wa u pdiang sñiawbha u yeiwa pynbait ka Party daka luti wa toh, tangwa neidaw wa ym toh iwa da rai chwa, da paan por na ka Party wow pyndep chwa ya ki kaam wa sahkut yong ka chnat.