U Dr. Mukul Sangma da thoh u cha u Lat ka jylla ynne ka sngi wow thung daka takit kawa laitlooid wei wow pynkrehkaam daka Administrator’s Rule ha GHADC.
Haka chithi wa da thoh u Dr. Mukul da ong wa da em boon ki pynbaad wa em ki kaam baamtooh hapoh ki Autonomous District Council (ADC) khamtam ha GHADC katkam wa da mih khubor. Heiwa da mih leh ki khubor wa mih nachwa wa katkam wa chem lyngba ka RTI wa em i kam wa em boon ki kaam baamtooh hapoh ka GHADC.
Kini ki kaam baamtooh kiwa da pynbaad toh yei pynemkaam bakla yaka poisa wa poi da ki klur kawa naka poisa neibynta wow wanrah ya ki kaam pynroi daka GHADC khamtam ya kitu ki thaw wa dang sahdien wei wow yarap ya kiwa dooh.
Da ong u leh wa kani ka poisa wa da pynlait cha ki ADC toh kiwa da kreh chitom yong ki deiwa booddien wow yaklam wa ki chnat ka sorkar pyrdi wa kynthup yaka Ministry of Finance yow pynku yaki bru ri-loom kiwa dang sahdien hanla ka 14th Finance Commission ym em ong wow e poisa cha ki ADC heidur ka Grant /Award kamwa da e cha ki Panchayati Raj.
Kamtæ u Dr. Mukul da ong u wa ini i pynemkaam bakla yaka poisa wa i baamtooh hapoh ka GHADC da wanrah ko chiboon i chitom yaki wakreh yong ka hadooh wa ym ye wow su yaka tulop la ar snem wei da pyntkoh yei krehkaam ka Council iwa da pynsepai yei thong wa da booh yaka na wa sdang.
Da ong u leh wa ini waroh i pynbaad em ki i sabut wa biang wei da em leh i yaleh wow pyndooh noh yaki sabut wa em i baamtooh da ki bru wa em hei bor wei emkaam wow khanglaad ya ini.
Kamtæ da kyntu u ya u Lat ka jylla wow pynkrehkaam noh yaka Para 16 (2) ka Sixth Schedule wei wow thung yaka takit kawa laitlood neidaw wa katwa dang pynslem daw elaad ko ya kitu kiwa emkti ha ki kaam baamtooh wow lait ki nei pynchitom kamjooh daw pynchlur ko ya kiwi wow leh ki yeiwa jooh.
