Shillong: “I kam ki bru wa im cha ki thaw wa em cha kdong cha chmiang sñiaw i wa toh iwa eh yow ye u yow yei baam wa biang i wow tei yei doh i pran neibynta ki khynnah, ki manbei wa punkhon, kiwa dang e bu khon hawa nujor wa kiwa em cha thaaiñ sor. Tagwa kani ka program em ko i bynta wa emkaam wow pynsñiawthooh ya i wa i leh ye i wow yoh yei baam wa biang deiwa em kiwa pynyoo,” da ong u kongsan u Batskhem Ryntathiang, MDC Mairang Constituency, hawa e yei klam ha ka yalang ki wakreh Anganwadi, ASHA wa ki warep ynne ka sngi kawa pynman daka Krishi Vigyan Kendra, West Khasi Hills ha Tirot Sing Memorial Hall, Pyndengumiong, Mairang, West Khasi Hills District.
I emkaam ki baam wa biang neibynta ki khonbo, kiwa dang khai khynroo, kiwa punkhon, kiwa dang e bu, da batai daka L Warjri, Senior Scientist kamjooh ka Head of Krishi Vigyan Kendra West Khasi Hills kawa da ban joor wa da ki baam wa em ha ki chnong ki thaw leh da biang wow yoh yei baam wa tei yow lait na i duna baam.
Ka KVK West Khasi Hills da pynkhreh ko ya kiwa boon ki kaam kam chibynta wow lehkmen yaka Poshan Maah (Poshan Abhiyan 2020) wa kynthup wow saam symbe, ki jhoor, ki tiar ki tar wa ki yalang pynsñiawthooh paidbah hajrong ka phang pyrdi wow thung jhoor ha ki yung, ki skur heiwa ha kani ka yalang leh da saam yaki chyien da u kongsan u B. Ryntathiang, MDC Mairang Constituency wa u A Nongbri, SDO (C) Mairang Civil Sub Division cha ki warep, ki wakreh Anganwadi wa ki ASHA.
Hadien ini da pynbood saka e sikai daka Y. Sohtun, SMS (Horticulture) Krishi Vigyan Kendra, West Khasi Hills wa naka W. Marwein, Nutritionist, District Programme Officer, ICDS Cell, Nongstoin.
