U DC ka North Garo Hills District da pyntip u wa neidaw wa em 3 ngut kiwa yoh COVID-19 kitæ uwa chongdai dukan Hardware, ka kurim u wa u khon u ha Mendipathar Bazaar ynne ka 19 tarik, kamtæ da pynbna yaka Mendipathar Bazaar deilang waki thaw wa em chajan yow man ki kam ki Containment Zone le sngi nadooh i step ka 20 tarik hadooh i janmeit ka 22 tarik.
Ha kini ki 3 sngi waroh ki dukan wa em ha Mendipathar Bazaar u man ki kiwa khang wei kiwa em ha kini ki thaw wow neh bait ki hapoh yung.
Yaka Medical Screening yong waroh kiwa chongdai dukan kamjooh kiwa sah ha kani ka yaw u leh haka 21 tarik nadooh 10 waje i step ha ki thaw wa pynman yaw.
Ya kiwa sah cha i liang ka Assam kiwa em dukan ha i liang ka Meghalaya daw hap ki wow leh yaka Medical Screening deilang wa kiwa hayung hasem yong ki.
Ha kawi tawon ka khubor, u DC ka West Garo Hills won da pyntip u wa ka OPD ka Holy Cross Hospital deilang waka IPD yong ka u man ki kiwa khang mynstep ka 20 tarik wei daw wai won haka 21 tarik.
Yaka Tura Police Station da siat dawai kam ka laad yaad wei daw krehkaam biang ko nadooh i pyrdi synyaw ka 19 tarik.
Da pyntip u leh wa ynne da em 7 ngut kiwa dang yoh COVID-19:
1 na Holy Cross Hospital (Nursing Student), 1 na Tura PS, 4 ngut ki chipai kiwa liwan chapoh ka jylla wa 1 na Bhaitbari wa dang liwan chapoh ka jylla.
Ynne da em leh 26 ngut kiwa dang chait hapoh ka West Garo Hills District.
