Ka Border Security Force (BSF) wa ka Border Guard Bangladesh (BGB) ka Bangladesh ha ka yachem wa soo sngi ha Dhaka da rai ki wow pynduna ya iwon iwon i jia iwa wanrah yei yap ki bru ha khappood ki ar ri.
Neiliang ki heh ka BGB da wanrah ki ya ka phang wa yap ki nong Bangladesh ha khappood nei leh ki chipai BSF yeiwa ka BSF da ong ko wa da leh yeini yow yada ki na ki damok kiwa boon ngut kiwa kær talawiar ya ki.
Neiliang u Director General (DG) ka BGB u Major General Md Shafeenul Islam da kular u ya u DG ka BSF u Rakesh Asthana wa ki chipai ki ar liang u krehlang ki chirup wow yakhun ya ki kaam pyrchah aiñ ha khappood.
U General Islam da klam u leh hajrong i bynta wa yatoh wa ki bru wa duna i bor pyrkhat kiwa kaap cha chiliang u pood, wei neiliang u Asthana da kular u wow chimkhia yeini.
Ka yalang kam kani hapyrdi ki ar liang u man ko ha u snem wow wan ha India.
