Chong sa ha i rai ka sorkar wow wai yaki thaw mane Blai, da pyndep yei pynbait kyndon

Shillong: Ka yalang kawa le hapyrdi kiwa yahkhmat niam hapoh ka Shillong All Faith Forum (SAFF) wa u Chief Secretary ka jylla ynne ka sngi da pynsñiaw khaddooh ya ki pynkylla ha ka Standard Operating Procedures (SOP) næ ki kyndon wa hap wow bood manda wai ya ki thaw mane Blai kiwa em ha ka jylla.

U Chairman ka SAFF, u Rev. Bishop Purely Lyngdoh da pyntip u wa ha kani ka yalang, ka SAFF da e yumut khaddooh ko neibynta ki SOP hachwa wow wai yaki thaw mane Blai, wei ya ini i e yumut u Chairman yong ka Sub-Committee uwa man leh u Chief Secretary ka jylla daw pynsñiaw u leh ha ka sorkar wow chim ya ka rai. Da ong u wa i e yumut wow em i pynkylla ha ki SOP da man ko hadien wa ka SAFF da bichaar bha ko ya ki SOP wa da pynmih da ka sorkar rap nachwa.

U Bishop Lyngdoh da klam che u wa ka SAFF ym em pynbor ko ya ka sorkar wow wai jhan noh ya ki thaw mane Blai, wei hadooh katni ym pu tip mynnu u ye u wai yaki thaw mane Blai, tangwa chong ha ka sorkar lada yoo biang ko u wai wei kammon wow pynkrehkaam yaki SOP.

Kam wow kdaw heini wa ka sorkar da rai ko wow e laad u wai noh yaki thaw mane Blai kiwa em ha ka jylla nadooh ka tayaw wa nyngkong u Naichiphaw lada i long i man na ka khlam COVID-19 ha ka jylla man ko kawa rap bha. Ka sorkar da thung ko leh ya kawi ka Sub-Committee wa khlieh da u Chief Secretary wow bichaar bniah biang ya ki Standard Operating Procedure (SOP) lada emkaam wow pynkylla.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Katkam wa pynsñiaw u Bishop Lyngdoh, rap nachwa ka sorkar da booh ko ya ki kyndon wa du 100 ngut næ kamwa chipawa ki para wa ngait kiwa ye u lai cha ki thaw mane Blai ha i jooh i por, wei ini ym da che wei da pynkulmar khamtam ha ki thaw nongkyndong, deiwa ong u wa em ki thaw mane Blai kiwa em yaki thaw wa heh wa kyllooid, wei da pyntip u leh wa ka SAFF da e yumut ko wa heithaw wow pynrkhiñ neidaw wa khynnia, da toh wow e laad wow pynman yaka lehniam ha ki thaw wa heh kam ki madan, tangwa ym toh won ha i jooh i por.

Hawa yatoh wa ki lehniam wa kyrpang wa chisien chisnem, kini ym haap hapoh ka SOP wa da pynmih da ka sorkar, tangwa kitu ki niam kiwa em ya ki lehniam wa kyrpang, ki hap ki wow phah ya ki SOP deiwa paan bor na ki Deputy Commissioner.