Shillong: Ka sorkar jylla ha ki kajiak sngi wow wan daw chim ko yaka rai hajrong wow wai noh ya ki thaw mane Blai kiwa em ha ka jylla. Ya ini da pyntip da u Symbood Montri Rangbah, u Prestone Tynsong.
Ynne ka sngi ka Shillong All Faith Forum (SAFF) da dep pynsñiaw ko yei emkaam wow pynbait ha ki Standard Operating Procedures (SOPs) cha ka Sub-Committee wa da khlieh da u Chief Secretary hachwa wow wai ya ki thaw mane Blai. Wei ha i jooh i por ka Forum da klam che wa i rai wow wai yaki thaw mane Blai chong ha i yoh bor ka sorkar katkam i long i man ka jylla na ka khlam COVID-19.
Hawa yatoh i rai yong ka KJP wow wai noh ya ki yungmane nadooh ka 1 tarik u Naichiphaw, neiliang u Prestone da ong u wa ka sorkar ha kini ki sngi daw chim ko ya i rai, tangwa ym pu ye wow wai ya kiwon kiwon ki yung mane Blai katwa ym pu pynbiang ya ki kyndon wow yada na ka khlam COVID-19.
Da ong u wa lada man ki seiñ niam næ ki seiñbhalang næ kiwon kiwon leh, hap wow bood ya ki kyndon kamwa da phah nadooh wa wan ka khlam, wei katni ka sorkar ka dang lum ya ki e yumut wow chna ya ki SOP wei wow chim ya i rai. Da ong u wa ym em wa ye wow lai lait na ka sorkar wei ym ye wow leh kamtæ neibhah ym ye wow ong wa da biang lut.
U Prestone da ong u wa ka sorkar em ko yei sñiawkhia ha ini i por wa wan ka khlam, wei ka hap ko wow yada nei poor cha ki paidbah, deiwa kyntu leh ya waroh wow ya krehlang.
