Shillong: Ka Education Cell yong ka Khasi Students Union (KSU) hadien wa da thooh bniah da chem wa ka National Council for Teacher Education (NCTE) da dam noh ko ya wow tipmit yei puræ B. Ed hapoh ka Qoumrul Hoque School of Education yong ka USTM, kawa em ha Ri-Bhoi District.
Ynne ka sngi ka Education Cell ka KSU ha i yahkhmat u Education Secretary, u Raymond Kharjana da pyntip ko cha u montri ka chnat puræ puthi ka jylla, u Lahkmen Rymbui wei leh cha u Deputy Director ka chnat Directorate of Educational Research and Training (DERT) wa ka USTM da mut kow wow lai lait ya ki kyndon ka NCTE Act 1993 deiwa khut puræ B.Ed ya ki khynroo khyllood ka jylla khlem da yoh yei tipmit.
U Kharjana da ong u wa ini i thmu yong ka USTM wa khlem da tipmit da ka NCTE wow khut puræ B.Ed daw booh ko hei maa ya ki khynroo khyllood neibhah wa kam wow pynkynmoo da ki spah ngut ki khynroo ka jylla ha ki por wa da lai da chah thok ki ha ka CMJ University neidaw wa ym em yoh ko yei tipmit.
Da pynsñiaw u wa i leh ka USTM daw ktah wei booh ko hei eh chiboon ya ka mynried yong kiwa lai puræ kiwa da thap pyrtuid wow lai puræ ha kani ka skurbah neibynta ka B. Ed manda pyndep ki yei puræ neibhah wa NCTE ym tipmit ko yaka.
Hajrong ini, ka seiñ da paan pynche ko leh na u Registrar ka USTM wei ha i jooh i por da kyntu ya ka sorkar wow pynchitom ya kani ka skurbah katkam ki kyndon yong ka aiñ neibhah wa i thmu wow thok wow chukor ya kiwa lai puræ deiwa pynmih ya i pynbna (Advertisement) wow khut ya kiwa lai puræ ha ka kyrdan puræ B. Ed.
