U District Magistrate, East Jaiñtia Hills ynne da pyntip paidbah u wa ki chipai 97 BN BSF kiwa em ha khappood wa ka Bangladesh hapoh East Jaiñtia Hills kiwa sonteri ya u pood wa jrong 51.320 Km na BOP Khaliang hadooh BOP Ratacherra, da yaleh ki wow khang yei khayi tooh wa i leh kaam pyrchah aiñ ha khappood wei wow pyntikna wa ym poor u COVID-19 weiwa ka thaaiñ wa sonteri ki toh kawa joor i chalan tooh ya ki masi, pathi, kwai wa kiwi kiwi.
Chooh chooh da yoh yutip wa ki damok jooh pynlang paaid ki hajan khappood yow ye ki u leh ya ki kaam pyrchah aiñ.
Kamtæ neiliang u District Magistrate da pynkrehkaam u ya ka Section 144 CrPC chirup wa ka Regulation 3 ka The Meghalaya Epidemic Diseases, COVID-19 Regulation, 2020, wow khang yei lai i wan ki bru ha khappood dei thmu wow psiah chapoh Bangladesh, da khang leh wow chalan tooh ya ki masi wa ki mar kiwa ye u wanrah yei poor u COVID-19.
Da khang leh wow pynemkaam ya ki tiar pynmynsoo pyrchah ya ki chipai BSF kamjooh i lai i wan ki bru da ki kari wa dei kjat nadooh 8:00 i miet hadooh 6:00 i step.
