Shillong: Ka chnat puræ puthi ka jylla u pteiñ hi ko wow khang ya ki skur wa College hadooh wa ka sorkar pyrdi lyngba ka Ministry of Home Affairs (MHA) u chah ko da kamwi won.
Kam wow kdaw heini wa ka MHA da phah ko wow khang chwa ya waroh ki thaw puræ kiwa em hapoh ka ka ri hadooh ka 30 tarik Naikhynde wow yada na i poor yong ka khlam COVID-19 cha ki khynnah puræ, tangwa hadooh ynne ka sngi ym pu em em i pynbna da kamwi.
Hawa yaklam wa u Montri wa pait yaka chnat puræ puthi ha ka jylla, u Lahkmen Rymbui da ong u wa i booh por yong ka MHA da kut noh ko ynne ka sngi ka 30 tarik, tangwa neiliang ka chnat puræ puthi ka jylla ym pu phah wai ko yaka puræ puthi hadooh wa wa ka sorkar pyrdi pynbna ko da kamwi.
Da ong u leh wa katkam i phah ka MHA wa da pynmih ha ka 17 tarik uni u bna wow khang chwa ya ki thaw puræ puthi hadooh ka 30 tarik u pteiñ ko hadooh wa pynmih da kamwi i pynbna wa kynthup leh ya ki College, deiwa klam che wa ki skur u khang bait ha ka jylla lait noh du kitu kiwa emkaam ya i yarap na kiwa sikai ya ki khynnah Class IX hadooh XII.
Da ong u wa lada ka sorkar pyrdi pynmih ko da iwi i phah, neiliang ka sorkar jylla daw bichaar ko kammon wow lai chakhmat heiyatoh wa i wai yaki thaw puræ, deiwa ong leh lada yoh ya i phah na ka MHA, daw pynbait biang ya ki lynnong wa ki khynnah hap ki wow puræ.
