Jowai: Chibynta i leh burom yaka World Mental Health Day kawa jooh leh khlieh u snem, ha uni u snem leh neiliang ka chnat i chait i khiah ka West Jaiñtia Hills District lyngba ka District Mental Health Programme Jowai Civil Hospital Ialong, da chim ko wow kynmoo burom ya kani ka sngi deiwa pynman ya i pynsñiawthooh hajrong ki kjut wa ktah yei bor pyrkhat u bru wei kammon u yada na ka.
Yeini i pynsñiawthooh da pynman ha Caroline Colony Community Hall, Jowai haka yalang wa pynlai da u Dr. E. Dan Programme Officer DMHP, wei ka phang yong uni u snem toh ‘Mental Health for All’.
Ka Dr. A.M. Paswet, Psychiatrist, District Nodal Officer da batai ko yaki jait chitom waphær waphær wa ktah yei bor pyrkhat u bru, wei ong ko kiwa kam kini ki bru emkaam bha ki yei e mynsien na kiwa ha yung ha sem. Heijooh i por leh toh u lithooh dawai smat neibhah lada kun lada chah bait, daw poi cha u pood wym ye de ki u yakhun yeitæ i chitom iwa daw yah bakla ya ki.
Kamtæ i pynman ya kam kini ki yalang pynsñiawthooh man i iwa emkaam bha ha kini ki sngi, neibhah ye u man wa em ki manyung du neidaw wym em yoh ki yei pynche, ym tipsap ki kammon u yarap ya kiwa ha yung wa em i chitom hei bor pyrkhat. Da khana ko leh wa ini wot hadien wa wan ka khlam COVID-19 boon bha ki bru da chah ktah ki hei kjut bor pyrkhat.
Neitæ da yoh leh i klam naka S. Syngkon, Clinical Psychologist, DMHP kawa da batai ya soo tylli ki jait chitom bor pyrkhat wa kynthup yaka Eustress, Distress, Hyper stress wa ka Hypo Stress, heiwa ka Eustress toh kawa bha, katwa kiwi won emkaam u kiar. Kyntu ko wow man kiwa yarap yaki bru wa suba chitom bor pyrkhat khnang yow lait ki na iwon iwon i jia wa sñiawsih.
U Manbhakupar Pyrtuh, Advocate won da pynche u heiyatoh wa i hok ki bru wa dooh wa duk wa em yei chitom bor pyrkhat wa ye ki u yoh lyngba ka District Legal Services Authority.
Da emlang ha kani ka sngi ka N.M. Sangma Secretary, DLSA Jowai, u waheh chnong Caroline Colony u A. Gatphoh wa kiwi kiwi.
Chwa kani ka sngi won da em ki yakob thoh Poetry wa da pynman ha kani hi ka thaw hajrong ka phang “Your Mental health is as important as your physical health lets end the stigma”.
Kamtæ napyrdi ki 9 ngut wa chimbynta, ka Navarre Olivet Lyngdoh kawa na Caroline Calony da yoh ko yei naam jop, hei wa ar da yoh ka Bymonmiralda Lato kawa na Ladthadlaboh, wa le won ka Larisahun Phawa na Mynthong.
