Ka Dorbar Chnong Sakhain kawa em ha East Jaiñtia Hills haka wyrta wa phah da u Secretary Chnong da ong wa sñiawphylla yei mih khubor wa pynlait u E. Bamon wa u S. Pajuh wa katkam wa chem da ka RTI, kiwa kitkaam ka VEC ka chnong Sakhain da pynemkaam bakla ki yaka poisa Job Card.
Hadien wa yoo ya kani ka khubor, ka EC yong ka chnong Sakhain da chong pyrkhat yow thooh yei yong sakhiat wei da chem ki wa waroh i pynbaad ha ki khubor toh kiwa ym em yurim wa kiwa bakla suda. Wei ha i chem yong ki ym em iwon iwon i pynemkaam bakla yaka poisa Job Card iwa da pynkrehkaam yaka Scheme MGNREGA da kiwa kitkaam ka VEC. Ym jooh em leh iwon iwon i maham ya kiwa em Job Card da kiwa kitkaam yong ka VEC wei ka VEC ym jooh em e Contract ko leh ya kiwon kiwon ki kaam cha kiwon kiwon ki bru samen kamwa da pynbaad ha ki kot khubor.
Da ong wa ka yingkieñ wa da pynkreh em ko hapyrdi yong ka chnong kawa man leh ka yingkieñ kawa emkaam neibhah chiteiñ kiwa chong chnong hap ki wow lai lyngba kani ka yingkieñ neibynta wow kit wow bah yaki mar ki mata yow pynpoi cha ki yung ki sem yong ki.
Ka poisa wa da mang namo ka Estimate Sanction neibynta kani ka yingkieñ man ko kamwa T. 23 lak tam. Neidaw won wa ka VEC ym em poisa ko da kawa biang, kamtæ da e bor ya ka VEC wow thooh poisa chwa na kiwon kiwon ki bru samen kam ka ram yow pynlut chwa neibynta wow thied yaki tiar wa kiwi kiwi kiwa emkaam neibynta wow pynkreh ya kani ka yingkieñ. Kamjooh leh ka VEC da kyrpaad ko ya ki dkhot wa kiwa chong chnong waroh khlem da pynbor wei da i mon sñiawbha wow yarap u kynchew poisa katwa ye ki neibynta wow pyndap u thied ya kiwa emkaam katai ka yingkieñ.
Da pyntip leh wa u Biral Shadap leh man u du kam uwa chong chnong yong ka chnong uwa smat wow yarap poisa ya ka VEC wow thied ya ki tiar ki tar neibynta wow chna ya kani ka yingkieñ. I pynbaad yaki Overseer wa ki wakreh ka sorkar leh man ko iwa khlem yurim, neibhah wa i kamram yong kini toh wow yarap ya ka chnong neibynta wow pynlai bait ya ini i kreh. Wei kam ka chnong da e khublei ki ya kini ki bru wa lyngba yong ki da ye wow kreh bha yow pyndep yaki kaam ki jaam kiwa yatoh wa ki Scheme wa da yoh lyngba yong u BDO, Saipung Block khamtam kiwa yatoh waka Job Card (MGNREGA).
Da pynsñiaw leh yei phylla wa kammon ka RTI wa da yoh kiwa yaleh wa tip ko wa kiwa yahkhmat yong ka VEC da pynemkaam bakla ki yaka poisa hawa tang yei kreh leh ym pu em dep. Kani ka yingkieñ hadooh katni dang em ko hapyrdi i pynchna wei ym pu ye wow wai yaka, Wei hadooh katni katkam wa tip ka VEC kawa tikna toh wa ka chnong ym pu yoh lut ko yaka poisa kawa toh u yoh lyngba ka sorkar neibynta ka VEC yow su lut ya iwa emkaam yong waroh.
Neiliang yong ka chnong leh da jooh booddien ko yaki kaam ki jam yong ka VEC na i por cha i por wei ym jooh em chem ya iwon iwon i ujor na kiwa em Job Card. Wei lada em i ujor, toh i kamram yong ka chnong wow pynchitom ya kiwa bakla. Wei kamwa man kattæ hi ka chnong ym emkaam ko ya i yarap na kiwon kiwon ki bru samen kiwa kam u E. Bamon wa kiwa yahkhmat seiñ kam u S. Pajuh kiwa na jngai wa kiwa chnong ym tipmit ko. Wei i mih khubor kiwa kam ini da pynsñiawsih ko yaka chnong waroh kawi. Neibhah ini pyndooh mynsien ko ya kiwa yahkhmat kiwa kreh mon sñiawbha neibynta i bha yong ka chnong. Neibhah i thmu yong kiwa pynmih yaka khubor toh du wow pynsih yei pyrtuid wei wow pyndooh burom ya kiwa yahkhmat ka chnong, pynkut ka khubor na u Iaidsumar Lamare, Secretary Chnong Sakhain.
