Ka Environment Cell yong ka Khasi Students Union Laban Circle ynnin ka sngi da lai hiar ko yow sylli ya i thaw booh trep masi yong ki baar jylla hapoh ka thaaiñ Laban Pyllun kitæ ha Lower Lumparing, Rilbong, Maxwelton Estate wa ha Lawsohtun. Ha ini i lai pait ka seiñ da chem wa boon ki baar jylla da booh ki ya ki trep ri masi khlem da yoh bor naka chnong wei da chem leh wa da pyntooid ki ya i tngit cha ki wah wei da pynjakhlia ya ka bei rymaw.
Ka seiñ da dap ko da i lynngoh hajrong i leh yong kini ki baar jylla neidaw wa ka Laban waroh kawi ka haap ko hapoh ka Municipal tangwa kini ki bru da yoh ki wow ri masi wei wow chong buhai chnong ha kini ki thaw wei wow chna ya ki yung khlem yoh bor neiyi neiyi.
Ka seiñ da beiñ joor ko leh yei leh thlah yong ki bor pynlai neibhah ya ki Khasi ym e bor wow ri mrad katwa ya ki baar jylla won ym em wa pait.
Ka seiñ da jooh ujor ko hawa yatoh wa ini i bynta ya ka Municipal Board tangwa ym em chimkhia ki bor pynlai. Ka seiñ ha kini ki kajiak sngi daw lai booh ko ya ka dorkhat ha khmat yong ka Deputy Commissioner yong ka East Khasi Hills District wei kamjooh leh ha u CEO ka Municipal Board wow pyndam wei wow pynchitom ya kini ki bru katkam ka kyndon yong ka aiñ wei lada ym leh iyi iyi leh, ka seiñ daw chim ko da kiwi won ki laad ya kini ki bru wa wan buhai chnong wei kiwa pyntngit pynjakhlia ya ka bei rymaw.
