Kam chibynta wow pynkrehkaam yaka thong ri sniang namo ka Piggery Mission ka sorkar, ka seiñ ki warep ka Hill Farmers Union (HFU) da chimkhia ko wow pynmankaam ya kani ka Mission heiwa haka 10 tarik uni u bnai da pynman ya ka yalang wow pynche paidbah namo ka Awareness Program hajrong ini i kaam ha Nongstoin. Ha kani ka sngi da wan wow ya chimbynta wa ki dkhot yong ki Cooperative Society kiwa em ha West Khasi Hills District.
Nalor kiwa yahkhmat yong ka HFU Central Body, u Principal Secretary uwa pait yaka Veterinary wei kamjooh leh ya ki Cooperative Society u GHP Raju (IPS) da emlang u ha kani ka sngi kam u kongsan. Hawa klam kam u kongsan ha kani ka sngi, u Raju da pynsñiaw u yei sñiawkmen wow yoh u ya chimbynta ha kani ka yalang wa da pynlai da ka HFU West Khasi Hills District.
Da ong u wa da em le tylli ki bynta kiwa emkaam tam neibynta wow pynkrehkaam ya kani ka Mission ri sniang. Iwa nyngkong toh wow ri sniang neibynta wow pynkha ya ki khon sniang, kawa ar toh wow ri sniang neibynta wow pynheh wei iwa le toh neibynta wow pynmih ya ki baam sniang.
Heiyatoh wa i wym biang ki Doctor wa ki dawai, u Raju da ong u wa ka sorkar daw e sikai ya ki khynroo khyllood kiwa da stat yow man ki kam kiwa yarap wow e dawai ya ki sniang hawa kjut wa chitom. Neibynta wow pynkrehkaam ya kani ka Mission da kypaad u ya ka HFU wow ya krehlang wa ka sorkar.
Ha kani ka sngi da yoh leh ya i klam na ki sahep yong ka sorkar, ki Doctor wa ka chnat Veterinary, na kiwa mihkhmat ka yung krehkaam u DC ka West Khasi Hills District wei da yoh leh yei klam na u General Secretary yong ka seiñbei ka HFU u Allfondbirth Kharsyntiew, u Lumlang Kharsyiemlieh, General Secretary ka HFU West Khasi Hills District, u Z. Tympuin, President ka HFU West Khasi Hills District wei ya ka yalang da pynlai da u President yong ka HFU seiñbei u Commander Shangpliang.
