Jowai: Ka Parish Sahsniang, ka tnat niam wa 16 yong ka Diocese Jowai da wai ya ka ha kani ka 17 Naiynñiaw 2016 da u most Rev. Archbishop Thomas Menamparampil SDB. DD Apostolic Administrator ka Jowai Diocese.
Ha pyrdi i doom i suiñbneiñ wa u slap da wan da ki hajar ngut ki para wa ngait yong ka Balang na ki tnat niam (Parish) yong ka Jowai Diocese wa na ka Archdiocese Shillong.
Ha kani ka sngi ya ka kñia Mass wakhooid wa kamjooh i lehniam da yahkhmat da u Archbishop hei synran ki Langdoh Sohblai (Phadar) na ki tnat niam (Parish) yong ka Diocese wa ki Langdoh Sohblai kiwa wan na ka Archdiocese Shillong.
U Archbishop Menamparampil hei klam sneiñ klam khroo (Homily Speech) yong oo cha ki paidbah, ong u wa neibynta kani ka sngi wa khroo, u e ngooh ya u Blai yei maya wa sbun wa i wyrai u Blai ya ka Diocese Jowai wa da yoh ko u wai ya kani ka Parish ha Sahsniang Sait-that, kawa da seiñdur da u Bishop Vincent Kympat uwa da lai cha khmat u Blai.
Da ong u leh wa lyngba kani ka sngi kawa dap dei kmen wa yoh ya kani ka Parish yoo luti u pynyajan kiwa chong chnong cha u Jisu.
Da pynkhroo ya kani ka sngi deiwa pdiang ya ki 132 ngut ki khynroo khyllood, ki waheh wa ki manbei, da ka Sakramen pynskhem heiwa 120 ngut ki khynnah da yoh ki ya ka Communion wa nyngkong yong ki.
Ha kani ka sngi da emlang leh u Provincial ka seiñ CFM. Cap, Phadar Mathew, u Vicar General Jowai Diocese, Rev. Phadar Hilarius Lamare, u MP ka Shillong Parliamentary Constituency u ma Vincent H. Pala, U MLA ka thaiñ u ma Robinus Syngkon, ki MDC, ki Lyngdoh Sohblai (Phadar) wa ki bruniam napoh ka Diocese wa nabar, ki heh sorkar wa kiwi kiwi de.
Da ekti ya ka Parish wa thymme hapoh i pait yong u phadar Vinesh Tho.
Discussion about this post