Ka Joint Action Committee (JAC) hadooh ynne ka sngi ha ka yalang wa da pynman ha Phramer, West Jaiñtia Hills da dawa ko wow pynkrehkaam noh ya i bai kit mar ki kari heh namo ki truck katkam i dor wa da booh ka sorkar ya kawa da pynmih heipor wa sdang uni u snem wei katkam wa man hi ki nadooh wa sdang neiliang ki karkhana khyndaw-bilat da artatien ki wow pynkrehkaam yeini i dor thymme.
Kani ka JAC toh ka satri ki seiñ wa kynthup ya ka Jaiñtia Hills Truck Owners and Driver Association (JHTOA), All Jaiñtia Hills Clinkers and Cement Association (AJHCCA) wa ka Meghalaya Truckers Union (MTU).
Neiliang ka JAC da pyntip ko wa katkam ka hukum ka chnat Transport ka jylla ya kawa da pynmih ha ka 25 Naikhynde uni u snem da pynthymme ko ya i dor wow kit ya ki mar wei ya ini da leh hadien wa ki yalang yaklam hajrong kani ka phang hapyrdi ka sorkar, ki karkhana wa ka JAC da man ko kawa khlem mih soh mih sla.
Neiliang u Chairman ka JAC, u N. Tyngkan da ong u wa ka sorkar hadien wa da chong bichaar bniah ko da pynthymme noh ko ya i dor bai kit mar ki truck itæ T.7 hadooh T.11 chi kilometre chi ton ha ki sarok psiang, T.8 hadooh T. 12 chi ton chi kilometre ha ki sarok moo wei T. 10 hadooh T. 12 chi ton chi kilometre ha ki sarok khyndaw.
U Tyngkan da pyntip u leh wa ya ka rai wa da pdiang ya ini i dor thymme ka sorkar daw lai yachem ya u DTO ka East Jaiñtia Hills wow pynkrehkaam u ya kani ka dor wa thymme.
Neiliang u Nidamon Chullet uwa man kam u President ka JHTOA da pyntip u wa neiliang ka seiñ ki karkhana khyndaw-bilat da yaleh mukotduma ki pyrchah ya i rai ka sorkar wei hadien wa bichaar bniah neiliang ka Meghalaya High Court da pynksan ko ya ka hukum ka sorkar katkam ki kyndon ka Motor Vehicle Act.
Chooh chooh u Nidamon da kyntu u leh ya waroh ki tre truck kiwa na Ri-loom Jaiñtia kamjooh leh na Khasi wow krehlang ki wa ka JAC khnang wa u yoh myntoi ki tre jylla liang wanang na kani ka khih ka kreh.
